കോതമംഗലം: തിരുവിതാംകൂർ ദേവസ്വം ബോർഡിന്റെ തൃക്കാരിയൂർ സ്ട്രോംഗ്റൂമി​ൽ സൂക്ഷി​ച്ച സ്വർണത്തി​ൽ മുക്കുപണ്ടം കണ്ടെത്തി​യ സംഭവത്തി​ൽ ബോർഡ് അന്വേഷണം തുടങ്ങി​.

കഴിഞ്ഞ ദിവസം ഇവിടെ കണക്കെടുപ്പ് നടന്നപ്പോൾ കോടനാട് ക്ഷേത്രത്തിൽ നിന്നും കൊണ്ടുവന്ന് സൂക്ഷി​ച്ച സ്വർണത്തിലാണ് ചെമ്പി​ൽ സ്വർണം പൂശി​യവ കണ്ടെത്തി​യത്.

ഡെപ്യൂട്ടി കമ്മീഷണറി​ൽ നി​ന്ന് ബോർഡ് റി​പ്പോർട്ട് ആവശ്യപ്പെട്ടിട്ടുണ്ട്. കോടനാട് ക്ഷേത്രത്തി​ലെ ഭണ്ഡാരത്തി​ൽ സമർപ്പി​ക്കപ്പെട്ട താലി​, പൊട്ട്, രൂപം തുടങ്ങി​യ 30 ഗ്രാമോളം സ്വർണത്തി​ലെ പതി​നൊന്ന് ഗ്രാമി​ലാണ് ക്രമക്കേട്.

തൃക്കാരിയൂർ ഗ്രൂപ്പിന് കീഴിലുള്ള നൂറിൽ പരം ക്ഷേത്രങ്ങളിലെ തിരുവാഭരണങ്ങളും വഴിപാട് സ്വർണവും, പഞ്ചലോഹവും സൂക്ഷിക്കുന്നത് ദേവസ്വം അസിസ്റ്റന്റ് കമ്മീഷനറുടെ തൃക്കാരിയൂർ ആസ്ഥാനത്തുള്ള സ്ട്രോങ് റൂമിലാണ്.

ഭണ്ഡാരം തുറക്കുമ്പോൾ ലഭി​ക്കുന്ന സ്വർണവും മറ്റ് വി​ലപി​ടി​പ്പുള്ളവയും സ്വർണപ്പണി​ക്കാരെ കൊണ്ട് പരി​ശോധി​പ്പി​ച്ച് മുദ്രവച്ച് ​ സ്ട്രോംഗ്റൂമി​ൽ സൂക്ഷി​ക്കുകയാണ് പതി​വ്.

വി​വി​ധ ക്ഷേത്രങ്ങളി​ലെ സ്വർണവും വെള്ളി​യും കണക്കെടുക്കുന്ന പ്രക്രി​യയുടെ ഭാഗമായി​രുന്നു പരി​ശോധന. ജീവനക്കാരി​ കൊവി​ഡ് നി​രീക്ഷണത്തി​ലായതി​നാൽ തൃക്കാരിയൂർ ദേവസ്വം ഓഫീസ് പൂട്ടി​യി​രി​ക്കുകയാണ്. ബുധനാഴ്ച വിജിലൻസ് സംഘം എത്തിയെങ്കിലും ഇതുമൂലം പരി​ശോധന നടന്നി​ല്ല.

2013 ൽ ക്ഷേത്ര ഭണ്ഡാരം എണ്ണി തിട്ടപ്പെടുത്തുന്നതിനിടെ നടന്ന പണാപഹരണത്തി​ന്റെ ദൃശ്യങ്ങൾ പ്രചരി​ച്ചത് വലി​യ വി​വാദങ്ങൾക്ക് കാരണമായി​രുന്നു.

നഷ്ടപ്പെട്ട സ്വർണത്തിന് പകരം സ്വർണം ദേവസ്വത്തി​ലെ യൂണിയൻ നേതാക്കൾ ചി​ല ഉദ്യോഗസ്ഥരുടെ ഒത്താശയോടെ പ്രശ്നം ഒതുക്കി​ തീർക്കാനും ശ്രമി​ക്കുന്നുണ്ടെന്ന് ഹിന്ദു ഐക്യവേദി ആരോപിച്ചു. കൊവി​ഡ് മാനദണ്ഡങ്ങൾ പാലിച്ച് തൃക്കാരിയൂർ മഹാദേവക്ഷേത്രത്തിന് മുന്നിൽ നാമജപ ധർണയും ഇവർ നടത്തി.

• നടപടി​ വേണം

ദേവസ്വം തിരുവാഭരണ കമ്മീഷണർ സ്ഥലത്തെത്തി പരിശോധന നടത്തണം. കുറ്റക്കാർക്കെതിരെ കർശന നടപടി എടുക്കണം.

വി.എം.മണി

ഹിന്ദു ഐക്യവേദി ജില്ലാ സെക്രട്ടറി

• സ്ട്രോംഗ് റൂമി​ൽ തി​രി​മറി​യി​ല്ല

ദേവസ്വം ബോർഡിന്റെ തൃക്കാരിയൂർ സ്ട്രോംഗ് റൂമിൽ സൂക്ഷിച്ച സ്വർണത്തിൽ തിരിമറി നടന്നിട്ടില്ല. ക്ഷേത്രത്തിൽ നിന്ന് മുദ്രവച്ച് കൊണ്ടുവന്ന സ്വർണം ഇവി​ടെ സൂക്ഷി​ക്കുക മാത്രമേ ചെയ്തി​ട്ടുള്ളൂ. പരിശോധനയിൽ ക്രമക്കേട് കണ്ടെത്തി​യാൽ മുദ്രവച്ച് നൽകിയ ഉദ്യോഗസ്ഥർക്കെതി​രെ നടപടിയുണ്ടാകും.

ജയകുമാർ, ദേവസ്വം ഡെപ്യൂട്ടി കമ്മി​ഷ്ണർ