കൊച്ചി: നോർത്ത് ഗോവയ്ക്ക് സമീപം പെർണേമിനടുത്തുള്ള തുരങ്ക ചുമരുകൾ ഇടിഞ്ഞുവീണതിനെ തുടർന്ന് അറ്റകുറ്റപണികൾ നടക്കുന്ന കൊങ്കൺ പാതയിൽ ഗതാഗത നിയന്ത്രണം തുടരും. നേരത്തെ 20 വരെ പ്രഖ്യാപിച്ചിരുന്ന നിയന്ത്രണങ്ങളാണ് ജോലികൾ പൂർത്തിയാവാത്തതിനെ തുടർന്ന് നീട്ടിയത്. തിരുവനന്തപുരം -ലോക്മാന്യതിലക് ടെർമിനസ് പ്രതിദിന സർവീസ് (06346), റിട്ടേൺ സർവീസ് (06345) എന്നിവ സെപ്തംബർ പത്തു വരെ റദ്ദാക്കി. ആഴ്ചയിൽ മൂന്ന് ദിവസം സർവീസ് നടത്തുന്ന തിരുവനന്തപുരം-ന്യൂഡൽഹി രാജധാനി സൂപ്പർഫാസ്റ്റ് (02431) 23 മുതൽ സെപ്തംബർ 11 വരെയും, ന്യൂഡൽഹി -തിരുവനന്തപുരം രാജധാനിയുടെ (02432) 25 മുതൽ സെപ്തംബർ 9 വരെയുള്ള സർവീസുകളും പൂർണ്ണമായും റദ്ദാക്കി. ഇന്നത്തെ രാജധാനി സർവീസ് (02341) മഡ്ഗാവ്‌-ലോണ്ട ജംഗ്ഷൻ പൂനെ -പൻവേൽ വഴി തിരിച്ചുവിടും. ഇതിന് പുറമെ സെപ്തംബർ പത്തു വരെയുള്ള എറണാകുളം -ഹസ്രത്ത് നിസാമുദ്ദീൻ സൂപ്പർഫാസ്റ്റ് പ്രതിദിന സ്‌പെഷ്യൽ ട്രെയിനും (02617), ഈ ട്രെയിനിന്റെ മടക്ക സർവീസും (02618) ഈ വഴിയായിരിക്കും. നിസാമുദ്ദീൻ-എറണാകുളം തുരന്തോ പ്രതിവാര ട്രെയിൻ (02284) സെപ്തംബർ അഞ്ചു വരെയും എറണാകുളം-നിസാമുദ്ദീൻ തുരന്തോ സ്‌പെഷ്യൽ (02283) സെപ്തംബർ എട്ടു വരെയും നിലവിലെ പാത മാറി സർവീസ് നടത്തും. ജോലർപേട്ടൈ, ഗുണ്ട്കൽ, പൂനെ വഴിയായിരിക്കും സർവീസുകൾ.