മൂവാറ്റുപുഴ: ഓണക്കാലത്ത് വിഷരഹിത കാർഷിക ഉത്പന്നങ്ങൾ ലഭ്യമാക്കുവാൻ കാർഷിക വികസന കർഷക ക്ഷമ വകുപ്പിന്റെ ആഭിമുഖ്യത്തിൽ ഹോർട്ടികോർപ്പ്,വി.എഫ്.പി.സി.കെ എന്നിവരുടെ സഹകരണത്തോടെ 'ഓണ സമൃദ്ധി 2020 ' നാടൻ പഴം പച്ചക്കറി വിപണികൾ ജില്ലയിൽ ആരംഭിക്കുന്നു. പ്രാദേശികമായി ഉത്പാദിപ്പിച്ച

കർഷകരുടെ വിളകൾക്ക് മെച്ചപ്പെട്ട വില നൽകി സംഭരിച്ച് ആരംഭിക്കുന്ന വിപണികൾ 27 മുതൽ 30 വരെയാണ് പ്രവർത്തിക്കുന്നത്. ജില്ലയിൽ ആകെ 120 വിപണികളാണ് സജ്ജമാക്കുന്നത്. മൂവാറ്റുപുഴ ബ്ലോക്കിൽ 11 വിപണികളാണ് ആരംഭിക്കുന്നത്. ആരക്കുഴ, ആയവന, ആവോലി, കല്ലൂർക്കാട്, മഞ്ഞള്ളൂർ, മാറാടി, പായിപ്ര, വാളകം എന്നീ പഞ്ചായത്തുകളിലും മൂവാറ്റുപുഴ നഗരസഭയിലെ ടൗൺ യു.പി. സ്‌കൂൾ, ഇ.ഇ.സി. മാർക്കറ്റ് അഗ്രോസർവീസ് സെന്റർ, പൊലീസ് കോർട്ടേഴ്‌സിന് സമീപം എന്നിവിടങ്ങളിലാണ് വിപണി തുടങ്ങുന്നത്. ഓണസമൃദ്ധി വിപണികളുടെ ജില്ലാ തല ഉദ്ഘാടനം കൊവിഡ് മാനദണ്ഡങ്ങൾ അനുസരിച്ച് ഇ.ഇ.സി. മാർക്കറ്റ് അഗ്രോ സർവീസ് സെന്ററിൽ ഇന്ന്(ബുധൻ) വൈകിട്ട് എൽദോ എബ്രഹാം എം.എൽ.എ നിർവഹിക്കും. മുൻസിപ്പൽ ചെയർ പേഴ്‌സൺ, ഉഷ ശശിധരൻ അദ്ധ്യക്ഷത വഹിക്കും.ജില്ലാ പ്രിൻസിപ്പൽ കൃഷി ഓഫീസർ ദിലീപ് കുമാർ റ്റി. പദ്ധതി വിശദീകരണം

നടത്തും. എറണാകുളം ജില്ലാ പഞ്ചായത്ത് പ്രസിഡന്റ് ഡോളി കുര്യാക്കോസ് ആദ്യ വില്പന നിർവഹിക്കും. ജില്ലാ പഞ്ചായത്ത് മെമ്പർ എൻ. അരുൺ മുഖ്യ പ്രഭാഷണം നടത്തും. മുവാറ്റുപുഴ ബ്ലോക്ക് പഞ്ചായത്ത് പ്രസിഡന്റ് ലിസി ജോളി പച്ചക്കറി കിറ്റ് വിതരണം ഉദ്ഘാടനം ചെയ്യും.