കൊച്ചി: നയതന്ത്ര ബാഗേജിൽ സ്വർണം കടത്തിയ കേസിൽ നാലു പേരെക്കൂടി ദേശീയ അന്വേഷണ ഏജൻസി (എൻ.ഐ.എ) അറസ്റ്റ് ചെയ്തു. കോഴിക്കോട് സ്വദേശികളായ സി വി. ജിഫ്‌സൽ, മുഹമ്മദ് അബ്ദു ഷമീം, മലപ്പുറം സ്വദേശികളായ പി.അബൂബക്കർ, പി.എം. അബ്ദുൾ ഹമീദ് എന്നിവരാണ് പിടിയിലായത്.
സ്വർണം കടത്താനുള്ള ഗൂഢാലോചനയിൽ നാലുപേരും പങ്കാളികളായിരുന്നുവെന്നും ഇവർ സ്വർണക്കടത്തിൽ പണം നിക്ഷേപിച്ചിരുന്നുവെന്നും എൻ.ഐ.എ വെളിപ്പെടുത്തി. കോഴിക്കോട്, മലപ്പുറം ജില്ലകളിലെ വിവിധയിടങ്ങളിലെ ജുവലറികളിലും വീടുകളിലും ഇന്നലെ എൻ.ഐ. എ പരിശോധന നടത്തി. അബൂബക്കറിന്റെ ഉടമസ്ഥതയിലുള്ള കോഴിക്കോട്ടെ ജുവലറി, അബ്ദുൾ ഹമീദിന്റെ മലപ്പുറത്തുള്ള അമീൻ ഗോൾഡ്, ഷംസുദീന്റെ കോഴിക്കോട്ടെ അമ്പി ജുവലറി എന്നിവിടങ്ങളിലായിരുന്നു പരിശോധന. എൻ.ഐ.എ രജിസ്റ്റർ ചെയ്ത കേസിലെ 25 പ്രതികളിൽ 20 പേർ ഇതുവരെ പിടിയിലായി.