ഇടുക്കി :സംസ്ഥാനത്തെ വിവിധ മേഖലകളിലെ തൊഴിലാളികളിൽ നിന്നും മികച്ച തൊഴിലാളിയെ കണ്ടെത്തി തൊഴിലാളിശ്രേഷ്ഠ അവാർഡ് നൽകുന്നതിന് തൊഴിലും നൈപുണ്യവും വകുപ്പ് എൻട്രികൾ ക്ഷണിച്ചു. മികച്ച തൊഴിലാളിക്ക് കാഷ് അവാർഡും പ്രശംസിപത്രവും നൽകും. സെക്യൂരിറ്റി ഗാർഡ്, ചുമട്ടു തൊഴിലാളി, നിർമാണ തൊഴിലാളി, കള്ളുചെത്ത് തൊഴിലാളി, മരം കയറ്റ തൊഴിലാളി, തയ്യൽ തൊഴിലാളി, കയർ തൊഴിലാളി, കശുവണ്ടി തൊഴിലാളി, മോട്ടോർ തൊഴിലാളി, തോട്ടം തൊഴിലാളി, സെയിൽസ് മാൻ/ സെയിൽസ് വുമൺ, നഴ്സ്, ടെക്സ്‌റ്റൈൽ തൊഴിലാളി എന്നീ 13 തൊഴിൽ മേഖലകളാണ് ഇതിനായി നിശ്ചയിച്ചിരിക്കുന്നത്. തൊഴിലാളിയിൽ നിന്നും പതിനഞ്ചു ചോദ്യങ്ങളടങ്ങിയ ചോദ്യാവലി ഉൾപ്പെടുന്ന നോമിനേഷനും തൊഴിലാളിയെക്കുറിച്ച് തൊഴിലുടമ, ട്രേഡ് യൂണിയൻ പ്രതിനിധി എന്നിവരുടെ അഭിപ്രായവും ഓൺലൈൻ ആയി ശേഖരിച്ച്, സോഫ്റ്റ് വെയർ മുഖേന മാർക്ക് കണക്കാക്കും.തുടർന്ന് ലേബർ കമ്മീഷണർ നിശ്ചയിക്കുന്ന കട്ട് ഓഫ് മാർക്കിന്റെ അടിസ്ഥാനത്തിൽ യോഗ്യത നേടിയട്ടുള്ള തൊഴിലാളികളെ മൂന്ന് ഘട്ടങ്ങളിലായുള്ള ഇന്റർവ്യൂ നടത്തിയതിനു ശേഷമാണ് ഏറ്റവും മികച്ച തൊഴിലാളിയെ തെരഞ്ഞെടുക്കുന്നത്. തൊഴിലാളികളിൽ നിന്നും ഈ മാസം 13 മുതൽ ലേബർ കമ്മീഷണറുടെ വെബസൈറ്റ് ആയ www.lc.kerala.gov.in മുഖേന എൻട്രികൾ സ്വീകരിച്ചുതുടങ്ങും.