ഇടുക്കി: തദ്ദേശസ്വയംഭരണ സ്ഥാപനങ്ങളിലേക്ക് ഈ വർഷം നടത്തുന്ന പൊതുതിരഞ്ഞെടുപ്പിനുള്ള വോട്ടർ പട്ടികയുടെ രണ്ടാംഘട്ട പുതുക്കൽ നടപടികൾ ആഗസ്റ്റ് 12ന് ആരംഭിക്കുമെന്ന് സംസ്ഥാന തെരഞ്ഞെടുപ്പ് കമ്മീഷണർ വി. ഭാസ്‌കരൻ അറിയിച്ചു. ജൂൺ 17ന് പ്രസിദ്ധീകരിച്ച വോട്ടർ പട്ടികയാണ് പുതുക്കുന്നത്. വോട്ടർ പട്ടികയിലെ അടിസ്ഥാന പട്ടികയും സപ്ലിമെന്ററി പട്ടികകളും സംയോജിപ്പിച്ച് ആഗസ്റ്റ് 12ന് കരടായി പ്രസിദ്ധീകരിക്കും. www.lsgelection.kerala.gov.in എന്ന വെബ്‌സൈറ്റിൽ കരട് വോട്ടർപട്ടിക പരിശോധനക്ക് ലഭ്യമാകും. കരട് പട്ടികയിൽ ഉൾപ്പെട്ടിട്ടില്ലാത്തവർക്ക് പേര് ചേർക്കുന്നതിന് 12 മുതൽ ഓൺലൈൻ അപേക്ഷ സമർപ്പിക്കാം. ഉൾക്കുറിപ്പുകളിൽ തിരുത്തലുകൾ വരുത്തുന്നതിനും സ്ഥാനമാറ്റം വരുത്തുന്നതിനും ഓൺലൈൻ അപേക്ഷകളാണ് സമർപ്പിക്കേണ്ടത്. പട്ടികയിൽ നിന്ന് പേര് ഒഴിവാക്കുന്നതിനുള്ള ആക്ഷേപങ്ങൾ നേരിട്ടോ തപാലിലൂടെയോ വേണം ഇലക്ട്രൽ രജിസ്‌ട്രേഷൻ ഓഫീസർമാർക്ക് സമർപ്പിക്കേണ്ടത്. അപേക്ഷ ആഗസ്റ്റ് 26 വരെ സമർപ്പിക്കാം. അന്തിമ വോട്ടർപട്ടിക സെപ്തംബർ 26ന് പ്രസിദ്ധീകരിക്കും കരട് പട്ടികയിൽ ഉൾപ്പെട്ടിട്ടുള്ള മരണപ്പെട്ടവരുടെ പേരുവിവരം ഒഴിവാക്കുന്നതിന് ഇലക്ട്രൽ രജിസ്‌ട്രേഷൻ ഓഫീസർ സ്വമേധയാ നടപടി സ്വീകരിക്കും. ജനുവരി 20ന് പ്രസിദ്ധീകരിച്ച കരട് വോട്ടർ പട്ടിക സംബന്ധിച്ച് തീർപ്പാക്കാനുള്ള ആക്ഷേപങ്ങൾ കൂടി പരിശോധിച്ച് ഉചിത നടപടി സ്വീകരിക്കാൻ ഉദ്യോഗസ്ഥർക്ക് നിർദ്ദേശം നൽകി. അപേക്ഷകളും ആക്ഷേപങ്ങളും സംബന്ധിച്ച പരിശോധനകളും ഹിയറിംഗും കോവിഡ് പ്രോട്ടോക്കോൾ പാലിച്ച് നടത്തണമെന്നും കമ്മീഷണർ നിർദ്ദേശിച്ചു.