ഇടുക്കി : കാലവർഷക്കെടുതിയിൽ ഇടുക്കി ജില്ലയിൽ വൈദ്യുത മേഖലയ്ക്ക് 11.19 കോടി രൂപയുടെ നാശനഷ്ടം സംഭവിച്ചു. കനത്ത മഴയിലും കാറ്റിലും 11 കെ.വിപോസ്റ്റുകൾ 478 എണ്ണം, സാധാരണ പോസ്റ്റുകൾ 1378 എണ്ണം, മൂന്ന് ട്രാൻസ്‌ഫോമറുകൾ എന്നിവയ്ക്ക് തകരാർ സംഭവിച്ചിട്ടുണ്ട്. അഞ്ച് കിലോമീറ്റർ ദൂരത്തിൽ 11 കെ.വി ലൈനും 40 കിലോമീറ്റർ അളവിൽ സാധാരണ ലൈനും കമ്പി പൊട്ടി നഷ്ടം സംഭവിച്ചു. ഈ മാസം ഒന്നു മുതൽ ഇതുവരെയുള്ള കണക്കാണിത്. ചിത്തിരപുരം, രാജാക്കാട്, രാജകുമാരി, ഉടുമ്പൻചോല, പൈനാവ്, മറയൂർ, കട്ടപ്പന, ഉപ്പുതറ, പീരുമേട്, അടിമാലി , വണ്ടൻമേട്, ഇടമലക്കുടി, മുരിക്കാശ്ശേരി, അണക്കര മേഖലകളിലാണ് വൈദ്യുത വിതരണ ശൃംഖലയ്ക്ക് കൂടുതൽ നാശനഷ്ടം സംഭവിച്ചത്.