കണ്ണൂർ: ജില്ലയിൽ 126 പേർക്ക് ഇന്നലെ കൊവിഡ് 19 സ്ഥിരീകരിച്ചു. 111 പേർക്ക് സമ്പർക്കം മൂലമാണ് രോഗബാധ. ഒരാൾ വിദേശത്തു നിന്നും ഒമ്പതു പേർ ഇതര സംസ്ഥാനങ്ങളിൽ നിന്നും എത്തിയവരാണ്. ആരോഗ്യ പ്രവർത്തകരായ ഒരു സൈക്കാതെറാപ്പിസ്റ്റ്, രണ്ടു സ്റ്റാഫ് നഴ്സുമാർ, രണ്ട് അറ്റന്റന്റുമാർ എന്നിവർക്കും രോഗം സ്ഥിരീകരിച്ചു.ഇതോടെ ജില്ലയിൽ റിപ്പോർട്ട് ചെയ്യപ്പെട്ട കൊവിഡ് പോസിറ്റീവ് കേസുകൾ 2357 ആയി. ഇവരിൽ ഇന്നലെ രോഗമുക്തി നേടിയ 44 പേരടക്കം 1636 പേർ ആശുപത്രി വിട്ടു. കൊവിഡ് സ്ഥിരീകരിച്ച 16 പേർ ഉൾപ്പെടെ 23 പേർ മരണപ്പെട്ടു. ബാക്കി 698 പേർ ആശുപത്രികളിൽ ചികിത്സയിലാണ്.കൊവിഡ് 19മായി ബന്ധപ്പെട്ട് ജില്ലയിൽ നിലവിൽ നിരീക്ഷണത്തിലുള്ളത് 9141 പേരാണ്. ഇതിൽ 8494 പേർ വീടുകളിലും ബാക്കിയുള്ളവർ വിവിധ സ്ഥാപനങ്ങളിലുമാണ്.

പരിശോധന
ജില്ലയിൽ നിന്ന് ഇതുവരെ 50673 സാംപിളുകൾ പരിശോധനയ്ക്ക് അയച്ചതിൽ 49734 എണ്ണത്തിന്റെ ഫലം വന്നു. 939 എണ്ണത്തിന്റെ ഫലം ലഭിക്കാനുണ്ട്.

44 പേർക്കു രോഗമുക്തി
ആശുപത്രികളിലും ഫസ്റ്റ്‌ലൈൻ കൊവിഡ് ട്രീറ്റ്‌മെന്റ് സെന്ററുകളിലും ചികിത്സയിലായിരുന്ന 44 പേർ കൂടി ഇന്നലെ രോഗം ഭേദമായി ആശുപത്രി വിട്ടു. 16 പേർ അഞ്ചരക്കണ്ടി കോവിഡ് ട്രീറ്റ്‌മെന്റ് സെന്ററിൽ നിന്നും 11 പേർ സെഡ് പ്ലസ് സി.എഫ്.എൽ.ടി.സിയിൽ നിന്നും ഏഴ് പേർ കണ്ണൂർ ഗവ. മെഡിക്കൽ കോളേജിൽ നിന്നുമാണ് രോഗമുക്തി നേടിയത്. സ്‌പോർട്സ് ഹോസ്റ്റൽ സി.എഫ്.എൽ.ടി.സിയിൽ ചികിത്സയിലായിരുന്ന നാലും മിലിട്ടറി ആശുപത്രിയിൽ ചികിത്സയിലായിരുന്ന മൂന്നും കണ്ണൂർ ആസ്റ്റർ മിംസ്, ആയുർവേദ സി.എഫ്.എൽ.ടി.സി, ഇന്ദിരാഗാന്ധി ആശുപത്രി എന്നിവിടങ്ങളിൽ നിന്ന് ഓരോ പേരും ഇന്നലെ രോഗമുക്തരായി.

രോഗബാധിതർ 2357

രോഗമുക്തർ 1636

ചികിത്സയിൽ 698

നിരീക്ഷണത്തിൽ 9141