മട്ടന്നൂർ: കണ്ണൂർ അന്താരാഷ്ട്ര വിമാനത്താവളത്തിൽ എത്തുന്ന യാത്രക്കാർക്ക് ഇനി ഇലക്ട്രിക് കാറിൽ സുഖയാത്രയും. വിമാനത്താവളത്തിലെ പ്രീ പെയ്ഡ് ടാക്സി സർവീസ് ഏറ്റെടുത്ത കാലിക്കറ്റ്‌ ടൂർസ് ആൻഡ് ട്രാവൽസ് കമ്പനിയാണ് യാത്രക്കാർക്കായി ഇലക്ട്രിക് കാർ സംവിധാനം ഏർപ്പെടുത്തിയിരിക്കുന്നത്.

തുടക്കത്തിൽ മൂന്ന് കാറുകളാണ് സർവീസ് തുടങ്ങുക. പിന്നീട് എണ്ണം കൂട്ടും. ഒരു ചാർജിംഗിൽ 180 കിലോമീറ്റർ മാത്രമാണ് സർവീസ് നടത്താൻ സാധിക്കുക. നിലവിൽ ചാർജിംഗ് സ്റ്റേഷൻ കണ്ണൂർ വിമാനത്താവളത്തിൽ മാത്രമാണ് ഉള്ളത്. മട്ടന്നൂർ, കൂത്തുപറമ്പ്, തലശേരി, പയ്യന്നൂർ തുടങ്ങിയ സ്ഥലങ്ങളിൽ കൂടി ചാർജിംഗ് സ്റ്റേഷൻ വരുന്നതോടെ കാറുകളുടെ എണ്ണം വർദ്ധിപ്പിക്കുമെന്ന് എം.ഡി ഷൈജു നമ്പറോൻ അറിയിച്ചു. ഇന്ന്‌ വൈകിട്ട് 3.30 നു എയർപോർട്ട് ടെർമിനലിൽ നടക്കുന്ന ചടങ്ങിൽ ഇലക്ട്രിക് കാറുകളുടെ ഉദ്ഘാടനം കിയാൽ എം.ഡി. വി. തുളസീദാസ്‌ നിർവഹിക്കും. സബ് കളക്ടർ ആസിഫ് കെ. യൂസഫ് മുഖ്യാതിഥിയാകും. കണ്ണൂർ ആർ.ടി.ഒ ഇ.എസ്. ഉണ്ണികൃഷ്ണൻ, മട്ടന്നൂർ നഗരസഭ ചെയർപേഴ്സൺ അനിത വേണു, കീഴല്ലൂർ പഞ്ചായത്ത്‌ പ്രസിഡന്റ്‌ എം. രാജൻ, കണ്ണൂർ വിമാനത്താവളം എക്സിക്യൂട്ടീവ് ഡയറക്ടർ ടി.പി. ജോസ് തുടങ്ങിയവർ സംസാരിക്കും.