സുൽത്താൻ ബത്തേരി: സ്വന്തം നാട്ടിലേക്ക് പോകാൻ നിവൃത്തിയില്ലാതെ നട്ടംതിരിഞ്ഞ ആസ്സാമിൽ നിന്നുള്ള കുടുംബത്തിന് സഹായഹസ്തവുമായി ബത്തേരി കെ.എസ്.ആർ.ടി.സി ഡിപ്പോയിലെ ദുരന്തനിവാരണ സേനയും ടീം മിഷൻ ബത്തേരിയും എത്തി. കൊവിഡ് വ്യാപനത്തെ തുടർന്ന് പണിയില്ലാതായ കുടുംബത്തെയാണ് അവരുടെ നാട്ടിലേക്ക് എത്തിക്കുന്നതിനുവേണ്ട സഹായം ചെയ്തു കൊടുത്തത്.

നിലമ്പൂരിൽ കോഴിഫാമിൽ ജോലിചെയ്തിരുന്ന കുടുംബമാണ് തൊഴിൽ നഷ്ടപ്പെട്ടതോടെ നാട്ടിലേക്ക് പോകാൻ തിരിച്ചത്.
ബംഗളുരു വഴി പോകാമെന്ന് കരുതിയാണ് രണ്ട് സ്ത്രീകളും രണ്ട് പുരുഷന്മാരും നാല് കുട്ടികളുമടങ്ങുന്ന ആസാം കുടുംബം ബത്തേരി കെ.എസ്.ആർ.ടി.സി ഡിപ്പോവിൽ ഇന്നലെ കാലത്ത് എത്തിയത്. ഇവിടെ എത്തിയപ്പോഴാണ് ബത്തേരിയിൽ നിന്ന് അന്തർ സംസ്ഥാന സർവ്വീസുകൾ ഒന്നും പോകുന്നില്ലെന്ന് അറിഞ്ഞത്. കുടുംബത്തിന്റെ ദുരവസ്ഥ മനസ്സിലാക്കിയ ജീവനക്കാർ ഡിപ്പോവിലെ ദുരന്ത നിവാരണ സേനയുമായി ബന്ധപ്പെടുകയും ഇവർ ബത്തേരി കേന്ദ്രമായി പ്രവർത്തിക്കുന്ന ടീം മിഷനുമായി ചേർന്ന് ഇവരെ ബംഗളുരുവിലെത്തിക്കുന്നതിന് നടപടി സ്വീകരിക്കുകയും ചെയ്തു. കുടുംബത്തിന് ഭക്ഷണവും മറ്റും നൽകുകയും യാത്രാ പാസ് ശരിയാക്കി നൽകുകയും ചെയ്തു. ഒരു ആംബുലൻസിൽ ഇവരെ ബംഗളുരുവിൽ എത്തിക്കുന്നതിന് വേണ്ട നടപടിയും സ്വീകരിച്ചു. ആംബുലൻസിന്റെ വാടയും നാട്ടിലെത്താനുള്ള യാത്ര ചിലവും കെ.എസ്.ആർ.ടി.സിയുടെ ഡി.എം.ടീമും, ടീംമിഷനും ചേർന്ന് നൽകുകയുണ്ടായി.
കൊവിഡ് വ്യാപനത്തെ തുടർന്ന് ഇവർക്ക് പണിയില്ലാതായിട്ട് മൂന്ന് മാസമായി. നാട്ടിലേക്ക് മടങ്ങാതെ പട്ടിണിയും പരിവട്ടവുമായി കഴിയുകയായിരുന്നു ഇതുവരെ. ഇനിയും പിടിച്ചുനിൽക്കാനാവില്ലെന്നു വന്നതോടെയാണ് നാട്ടിലേക്ക് പോകാൻ തീരുമാനിച്ചത്.

സുൽത്താൻ ബത്തേരിയിലെത്തിയാൽ ബാംഗ്ലൂർക്ക് വണ്ടികിട്ടുമെന്നും അവിടെ നിന്ന് ആസാമിലേക്ക് ട്രെയിൻമാർഗ്ഗം നാട്ടിലെത്താമെന്ന് കരുതിയാണ് ഇവർ ബത്തേരിയിലെത്തിയത്.