സുൽത്താൻ ബത്തേരി: പൊതുഗതാഗത സംവിധാനത്തിൽ നിന്ന് അകന്ന സ്ഥിരം യാത്രക്കാരെ ആകർഷിക്കാൻ കെ.എസ്.ആർ.ടി.സി ആരംഭിച്ച ബോൺഡ് പദ്ധതി ജില്ലയിൽ ഈ മാസം 19 ന് ആരംഭിക്കും. ബത്തേരി ഡിപ്പോയിലാണ് പദ്ധതി നടപ്പാക്കുന്നത്. പദ്ധതിയുടെ ബോൺഡ് ടിക്കറ്റ് വിതരണോദ്ഘാടനം വടക്കൻമേഖല എക്സിക്യൂട്ടീവ് ഡയറക്ടർ സി.വി.രാജേന്ദ്രൻ യാത്രക്കാരിക്ക് നൽകികൊണ്ട് നിർവ്വഹിച്ചു. എടിഒ കെ.ജയകുമാർ, ജനറൽ കൺട്രോളിംഗ് ഇൻസ്‌പെക്ടർ ഹരിരാജൻ, സ്റ്റേഷൻ മാസ്റ്റർ എൻ.രാജൻ, പി..കെ.ബാബു, ഡി.ഇ.ബിജു തുടങ്ങിയവർ സംബന്ധിച്ചു.
സർക്കാർ ഉദ്യോഗസ്ഥരെയും, സ്വകാര്യമേഖലയിലും മറ്റുമുള്ള സ്ഥിരം ജോലിക്കാരെയും ലക്ഷ്യവെച്ചാണ് ബസ് ഓൺ ഡിമാന്റ്(ബോൺഡ്) പദ്ധതി കെ.എസ്.ആർ.ടി.സി നടപ്പാക്കുന്നത്. മുൻകൂർ പണമടച്ച യാത്രക്കാർക്ക് ബോൺഡ് സീസൺ ടിക്കറ്റുകൾ നൽകി യാത്രക്കാരെ കെ.എസ്.ആർ.ടി.സിയിലേക്ക് കൂടുതൽ അടുപ്പിക്കുകയാണ് ലക്ഷ്യം. നെയ്യാറ്റിൻകര, നെടുമങ്ങാട്,പാലക്കാട് ഡിപ്പോകളിൽ പദ്ധതി നടപ്പിലാക്കിയിട്ടുണ്ട്.
കൊവിഡ് 19 പശ്ചാത്തലത്തിൽ യാത്രക്കാരുടെ എണ്ണം കുറയുന്നതും, എല്ലാവരും സ്വകാര്യ വാഹനങ്ങൾ നിരത്തിലിറക്കുന്നതും പൊതുമേഖല യാത്രാസംവിധാനത്തിന് തിരിച്ചടിയായിട്ടുണ്ട്. മുൻകൂട്ടി പണമടച്ച് ഡിപ്പോയിൽ നിന്നു വാങ്ങുന്ന ബോൺഡ് സീസൺ ടിക്കറ്റുകൾ വഴി യാത്ര ഉറപ്പുനൽകുകയാണ് ചെയ്യുന്നത്.

പത്ത് ദിവസം മുതൽ 30 ദിവസം വരെ കാലാവധിയുള്ള ബോൺഡുകൾ അഞ്ച്, പത്ത്, പതിനഞ്ച്, ഇരുപത്, ഇരുപത്തഞ്ച് എന്നിങ്ങനെ ദിവസങ്ങൾ കണക്കാക്കിയാണ് നൽകുന്നത്. യാത്രക്കാരുടെ ഇരുചക്രവാനങ്ങൾ ബസ് സ്റ്റേഷനുകളിൽ സൂക്ഷിക്കാനുള്ള സൗകര്യവും ഒരുക്കിയിട്ടുണ്ട്. ബോൺഡ് ടിക്കറ്റു വാങ്ങുന്നവർ രാവിലെ കയറുന്നിടത്തുതന്നെ വൈകീട്ട് തിരിച്ചിറക്കുകയും ചെയ്യും. ഒരേ ഓഫീസിലെ പത്തിൽ കൂടുൽ ജീവനക്കാരുണ്ടങ്കിൽ അവരെയെല്ലാം ഒരു ബസ്സിൽ കൊണ്ടുപോകുന്നതിനുള്ള അവസരവും ഉണ്ട്. ഇതിലെ യാത്രക്കാർക്ക് സീറ്റുകൾ അധികൃതർ ഉറപ്പ് നൽകുന്നുണ്ട്. യാത്രക്കാർക്ക് സൗജന്യമായി ദിനപത്രവും സാനിറ്റൈസർ, വൈഫൈകണക്ഷൻ എന്നിവയും ലഭ്യമാക്കും.

ബോൺഡ് ബസ്സുകളിൽ യാത്രചെയ്യുന്നവർക്ക് നിലവിലെ ഇൻഷൂറൻസിന് പുറമെ പത്ത് ലക്ഷം രൂപയുടെ അപകട സമൂഹ ഇൻഷൂറൻസും ലഭ്യമാക്കും. ഈ മാസം 19ന് സുൽത്താൻ ബത്തേരി കൽപ്പറ്റ റൂട്ടിലാണ് പദ്ധതി പ്രകാരം ബസ് സർവ്വീസ് തുടങ്ങുന്നത്. ഇതുവരെ ഈ റൂട്ടിൽ 30 യാത്രക്കാർ ബോൺഡ് ബുക്ക് ചെയ്തി്ടുണ്ട്. രണ്ടാം ഘട്ടത്തിൽ ചുള്ളിയോട് അമ്പലയവയൽ കൽപ്പറ്റ റൂട്ടിലും ബസ് സർവ്വീസ് നടത്തുമെന്നും ഈ റൂട്ടിലും 30 പേർ ബോൺഡ് പദ്ധതിയിൽ ബുക്ക് ചെയ്തതായും അധികൃതർ വ്യക്തമാക്കി. തുടർന്ന് ബത്തേരി പുൽപ്പള്ളി, ബത്തേരി മാനന്തവാടി റൂട്ടുകളിൽ നടപ്പാക്കും. പദ്ധതിയെ കുറിച്ച് അറിയാൻ 09495682648, 09447518598, 09947076702 എന്നീ നമ്പറുകളിൽ ബന്ധപ്പെടാം.