പേരാമ്പ്ര: തന്റെ ചികിത്സയ്ക്കായി നാട്ടുകാർ സ്വരൂപിച്ച ഫണ്ടിൽ നിന്നും ഒരു വിഹിതം കാൻസർ രോഗിയ്ക്ക് നൽകി യുവാവിന്റെ മാതൃക. പുളിയോട്ട്മുക്ക് താണിയത്ത് അനീഷാണ് ചികിത്സ പൂർത്തിയാകും മുൻപെ അരലക്ഷം രൂപ അർബുദ രോഗിയായ കുറുങ്ങോട്ടിടത്തിൽ വസന്തക്ക് കൈമാറിയത്. 9,​83,​238 രൂപയാണ് നാട്ടുകാർ സ്വരൂപിച്ച് നൽകിയത്. അനീഷിന്റെ മനസിനെ ചികിത്സാ സഹായ കമ്മിറ്റി അഭിനന്ദിച്ചു. ചടങ്ങിൽ വി.ടി ബാലൻ അദ്ധ്യക്ഷത വഹിച്ചു. പഞ്ചായത്ത് അംഗം മുണ്ടോളി ചന്ദ്രൻ ഫണ്ട് അനീഷിന്റെ കുടുംബത്തിന് കൈമാറി. കൺവീനർ സനൂപ് ഇങ്ങോളി,​ ട്രഷറർ എൻ. ഷാജു, ആർ.ബി. രാജേഷ്, ഇ.കെ. ബാലൻ, സജീവൻ കൊയിലോത്ത്, എം. അജയൻ എന്നിവർ സംസാരിച്ചു.