കൽപ്പറ്റ: 2018ലെ പ്രളയത്തിൽ വീടും സ്ഥലവും നഷ്ടപ്പെട്ട കുടുംബങ്ങൾക്ക് കണിയാമ്പറ്റ പഞ്ചായത്തിലെ ചിത്രമൂലയിൽ ജില്ലാ ഭരണകൂടത്തിന്റെ നേതൃത്വത്തിൽ നിർമ്മാണം പൂർത്തിയാക്കിയ സുസ്മിതം ഫ്ളാറ്റ് സമുച്ചയത്തിന്റെ ഉദ്ഘാടനവും താക്കോൽദാനവും ഇന്ന് ഉച്ചയ്ക്ക് 12 ന് റവന്യു, ഭവന നിർമ്മാണ വകുപ്പ് മന്ത്രി ഇ.ചന്ദ്രശേഖരൻ നിർവ്വഹിക്കും. സി.കെ.ശശീന്ദ്രൻ എം.എൽ.എ അദ്ധ്യക്ഷത വഹിക്കും.

വിൽസൺ മണ്ണാട്ടുപറമ്പിൽ സൗജന്യമായി നൽകിയ 14 സെന്റ് ഭൂമിയിൽ സർക്കാർ ധനസഹായവും യൂണിയൻ ബാങ്ക് ഓഫ് ഇന്ത്യ കൽപ്പറ്റ ശാഖയുടെയും ജില്ലാ നിർമ്മിതി കേന്ദ്രയുടെയും സാമ്പത്തിക സഹായത്തോടെയാണ് 10 കുടുംബങ്ങൾക്ക് താമസിക്കാവുന്ന സുസ്മിതം ഫ്ളാറ്റ് സമുച്ചയത്തിന്റെ നിർമ്മാണം ജില്ലാ നിർമ്മിതി കേന്ദ്രം പൂർത്തീകരിച്ചത്. വൈത്തിരി താലൂക്കിലെ വിവിധ പഞ്ചായത്തുകളിൽ പുറമ്പോക്കിൽ താമസിക്കുന്ന 10 കുടുംബങ്ങളെ ഇവിടെ പുനരധിവസിപ്പിക്കും. സ്വന്തമായി ഭൂമിയില്ലാതെ പുഴ പുറമ്പോക്കിൽ പ്ലാസ്റ്റിക്ക് ഷീറ്റ് മേഞ്ഞ് താമസിച്ചിരുന്ന, ഓരോ വർഷക്കാലത്തും ക്യാമ്പുകളിൽ അഭയം പ്രാപിച്ചിരുന്ന കുടുംബങ്ങളാണിത്.

ജില്ലയിലെ പ്രളയ പുനരധിവാസ പദ്ധതിയിൽ ഉൾപ്പെടുത്തി ആദ്യമായി നിർമ്മിച്ച ഫളാറ്റ് സമുച്ചയമാണ് ഇത്.

കേരള സർക്കാറിന്റെ റീ ബിൽഡ് പദ്ധതിയിൽ ഉൾപ്പെടുത്തി വീടൊന്നിന് 4 ലക്ഷം രൂപയും യൂണിയൻ ബാങ്ക് (മുൻ കോർപ്പറേഷൻ ബാങ്ക്) നൽകിയ 90,000 രൂപയും ജില്ലാ നിർമ്മിതി കേന്ദ്രത്തിന്റെ സാമ്പത്തിക സഹായവും ഉൾക്കൊള്ളിച്ചു 5150 ചതുരശ്ര അടി വിസ്തൃതിലാണ് നിർമ്മാണം. രണ്ട് കിടപ്പ് മുറികൾ, വിശാലമായ ഹാൾ, കിച്ചൺ, ടോയ്‌ലറ്റ്, വരാന്ത തുടങ്ങിയ സൗകര്യങ്ങളുണ്ട്. വൈദ്യുതീകരണം, കുടിവെള്ളം, മുറ്റം ഇന്റർലോക്ക്, ഹാൻഡ് റെയിൽസോടു കൂടിയ സംരക്ഷണ ഭിത്തി തുടങ്ങിയ പ്രവൃത്തികളും പൂർത്തീകരിച്ചിട്ടുണ്ട്.

ഉദ്ഘാടന ചടങ്ങിൽ ജില്ലാ പഞ്ചായത്ത് പ്രസിഡന്റ് കെ.ബി.നസീമ, ജില്ലാ കലക്ടർ ഡോ.അദീല അബ്ദുള്ള, എ.ഡി.എം ഇ. മുഹമ്മദ് യൂസഫ്, പനമരം ബ്ലോക്ക് പഞ്ചായത്ത് പ്രസിഡണ്ട് ടി.എസ്. ദിലീപ് കുമാർ, കണിയാമ്പറ്റ ഗ്രാമ പഞ്ചായത്ത് പ്രസിഡണ്ട് ബിനു ജേക്കബ് തുടങ്ങിയവർ പങ്കെടുക്കും.

(ചിത്രം)

മന്ത്രി ഇ. ചന്ദ്രശേഖരൻ ഇന്ന് ഉദ്ഘാടനം ചെയ്യുന്ന കണിയാമ്പറ്റ പഞ്ചായത്തിലെ ചിത്രമൂലയിൽ നിർമ്മാണം പൂർത്തിയാക്കിയ സുസ്മിതം ഫ്ളാറ്റ് സമുച്ചയം