കോട്ടയം: പ്രളയ ദുരിതത്തിലായ കോട്ടയം ജില്ലയിലെ വിവിധ പ്രദേശങ്ങളിലെ ജനങ്ങൾക്ക് ദുരിതാശ്വാസ സഹായങ്ങൾ എത്തിക്കുന്നതിനും, ക്യാമ്പുകൾ പ്രവർത്തിപ്പിക്കുന്നതിനും ജില്ലയിലെ പ്രളയ ബാധിത ഗ്രാമ പഞ്ചായത്തുകൾക്കും മുനിസിപ്പാലിറ്റികൾക്കും ബ്ലോക്ക്, ജില്ലാ പഞ്ചായത്തുകൾക്കും സർക്കാർ അടിയന്തര ധനസഹായം നൽകണമെന്ന് ജില്ലാ പഞ്ചായത്ത് പ്രസിഡന്റ് അഡ്വ. സെബാസ്റ്റ്യൻ കുളത്തുങ്കൽ ആവശ്യപ്പെട്ടു. കൊവിഡ് ഫസ്റ്റ് ലെവൽ ട്രീറ്റ്മെന്റ് സെന്ററുകൾ പ്രവർത്തിക്കുന്നതിന്റെ ഭാരിച്ച ചിലവുകൾ അധിക ചുമതലയായി വന്നതോടുകൂടി ജില്ലയിലെ തദ്ദേശ സ്ഥാപനങ്ങൾ കടുത്ത സാമ്പത്തിക പ്രതിസന്ധിയിലാണ്. കൊവിഡിന്റെ പശ്ചാത്തലത്തിൽ തനത് വരുമാനം ഗണ്യമായി കുറഞ്ഞതും സ്ഥിതി രൂക്ഷമായിരിക്കുകയാണ്. പ്രളയ ദുരിതാശ്വാസ പ്രവർത്തനങ്ങളിൽ റവന്യൂ ഉൾപ്പെടെയുള്ള സർക്കാർ ഡിപ്പാർട്ട്മെന്റുകൾ കൂടുതൽ സഹായങ്ങൾ എത്തിക്കണമെന്നും ജില്ലാ പഞ്ചായത്ത് പ്രസിഡന്റ് ആവശ്യപ്പെട്ടു.