നെടുങ്കണ്ടം : സംഘം ചേർന്ന് വലിക്കാൻ സൂക്ഷിച്ച കഞ്ചാവുമായി യുവാവ് എക്‌സൈസ് സംഘത്തിന്റെ പിടിയിൽ. തൂക്കുപാലം മുരുകൻപാറ ബ്ലോക്ക് നമ്പർ 766 ൽ അഖിൽ (20) ആണ് പിടിയിലായത്. ചോറ്റുപാറ മന്തിപ്പാറ ഭാഗത്ത് സ്വകാര്യവ്യക്തിയുടെ പറമ്പിൽ യുവാക്കൾ കഞ്ചാവ് വലിക്കാൻ ഒത്തു കൂടുന്നതായിയുള്ള രഹസ്യ വിവരത്തിനെ തുടർന്ന് പ്രദേശം നിരീക്ഷണത്തിലായിരുന്നു. സംശയാസ്പദമായ സാഹചര്യത്തിൽ യുവാവിനെ കണ്ടതിനെ തുടർന്നാണ് പരിശോധന നടത്തിയത്. ഉടുമ്പൻചോല എക്‌സൈസ് സർക്കിൾ ഇൻസ്‌പെക്ടർ കെ സന്തോഷ് കുമാറിന്റെ നേതൃത്വത്തിൽ നടത്തിയ പരിശോധനയിൽ 20 ഗ്രാം കഞ്ചാവുമായി യുവാവിനെ അറസ്റ്റ് ചെയ്തു. ഇന്റലിജൻസ് ബ്യൂറോ പ്രിവന്റീവ് ഓഫീസർ പ്രമോദ് എം പി, ഉടുമ്പൻചോല സർക്കിൾ ഓഫീസിലെ പ്രിവന്റീവ് ഓഫീസർ കെ എൻ രാജൻ, സിവിൽ എക്‌സൈസ് ഓഫീസർമാരായ ലിജോ ജോസഫ് , അനൂപ് കെ എസ്, നൗഷാദ് എം, രതീഷ് കുമാർ എം ആർ എന്നിവർ പങ്കെടുത്തു.