കോട്ടയം: ഓണത്തോടനുബന്ധിച്ച് സംസ്ഥാന സർക്കാർ സൗജന്യമായി നൽകുന്ന ഭക്ഷ്യവിഭവ കിറ്റുകളുടെ ആദ്യ ഘട്ട വിതരണം ജില്ലയിൽ പൂർത്തിയായി. എ.എ.വൈ (മഞ്ഞ) കാർഡ് ഉടമകൾക്കാണ് ആദ്യം നൽകിയത്. ആകെ 35126 കാർഡ് ഉടമകളിൽ 27386 പേർ കിറ്റ് കൈപ്പറ്റി. കോട്ടയം 7914, വൈക്കം 5111, കാഞ്ഞിരപ്പള്ളി 4062, മീനച്ചിൽ 6093, ചങ്ങനാശേരി 4206 എന്നിങ്ങനെയാണ് താലൂക്ക് അടിസ്ഥാനത്തിലുള്ള കണക്ക്.

പതിനൊന്നിനം സാധനങ്ങൾ ഉൾപെടുന്ന അഞ്ഞൂറു രൂപ വില വരുന്ന കിറ്റുകളാണ് വിതരണം ചെയ്യുന്നത്. പഞ്ചസാര (ഒരു കിലോ), ചെറുപയർ/ വൻ പയർ (500 ഗ്രാം വീതം), ശർക്കര (ഒരു കിലോ), വെള്ളിച്ചെണ്ണ (അര ലിറ്റർ), മുളകുപൊടി (100 ഗ്രാം), മല്ലിപ്പൊടി (100 ഗ്രാം), മഞ്ഞൾപ്പൊടി (100 ഗ്രാം) , സാമ്പാർ പൊടി (100ഗ്രാം), ഒരു പാക്കറ്റ് പപ്പടം (12 എണ്ണം) , സേമിയ/ പാലട (ഒരു പാക്കറ്റ് ), ഗോതമ്പ് നുറുക്ക് (ഒരു കിലോ ) എന്നിവയാണ് കിറ്റിലുള്ളത്. പി.എച്ച്.എച്ച് (പിങ്ക് നിറം) വിഭാഗക്കാർക്കുള്ള വിതരണം 19 ന് ആരംഭിച്ച് 22ന് പൂർത്തിയാക്കും. ഈ വിഭാഗത്തിൽപ്പെട്ട 165173 കാർഡുടമകളാണ് ജില്ലയിലുളളത്.