ചങ്ങനാശേരി: ഓണക്കാലത്ത് ചങ്ങനാശേരിയിലെ വ്യാപാരസ്ഥാപനങ്ങളുടെ പ്രവർത്തന സമയം രാവിലെ 7 മുതൽ വൈകിട്ട് 7 വരെയാക്കാൻ സർക്കിൾ ഇൻസ്‌പെക്ടർ പ്രശാന്ത് കുമാറിന്റെ അദ്ധ്യക്ഷതയിൽ കൂടിയ യോഗത്തിൽ തീരുമാനമായി. സെൻട്രൽ ജംഗ്ഷൻ മുതൽ പൊലീസ് സ്റ്റേഷൻ വരെ റോഡിന്റെ വടക്കുവശത്ത് സാധനങ്ങൾ ഇറക്കുന്നതിനും കയറ്റുന്നതിനും വാഹനങ്ങൾ പാർക്ക് ചെയ്യണം. കട ഉടമകൾ സ്വന്തം വാഹനങ്ങൾ ഈ ദിവസങ്ങളിൽ കടയുടെ മുൻപിൽ പാർക്ക് ചെയ്യരുത്. അസീസി റോഡ് മാർക്കറ്റ് റോഡിൽ നിന്ന് വൺവെ ആയിരിക്കും. ചെറിയ വാഹനങ്ങൾ ഇതുവഴി തിരിഞ്ഞു പോകണം. ആവശ്യ സാധനങ്ങൾ വിൽക്കുന്ന കടകളും തിരക്കുള്ള കടകളും ഉപഭോക്താക്കളെ കടകളിൽ പ്രവേശിപ്പിക്കുന്നതിന് നിയന്ത്രണങ്ങൾ ഏർപ്പെടുത്തണം. പ്രവേശനകവാടം കയർ കെട്ടി നിയന്ത്രിക്കണം. സാധനങ്ങൾ പരമാവധി ഡോർ ഡെലിവറി നൽകുന്നതിന് വ്യാപാരികൾ ശ്രദ്ധിക്കണം. മാസ്‌ക് ധരിച്ചിട്ടുണ്ടെന്ന് ഉറപ്പുവരുത്തണം. എസ്.ഐ ഷെമീർഖാൻ, മർച്ചന്റ്‌സ് അസോസിയേഷൻ പ്രസിഡന്റ് ബിജു ആന്റണി കയ്യാലപറമ്പിൽ, വ്യാപാരി വ്യവസായി സമതി ഏരിയ സെക്രട്ടറി ജോജി ജോസഫ് എന്നിവർ പങ്കെടുത്തു.