കോട്ടയം : കൊവിഡ് വ്യാപനം കൂടുതലായ കാലയളവിൽ തിരുവോണത്തോടനുബന്ധിച്ച് വ്യാപാര സ്ഥാപനങ്ങളിലുണ്ടാകുന്ന തിരക്ക് ഒഴിവാക്കുന്നതിനും കൊവിഡ് വ്യാപനം തടയുന്നതിനും ആഗസ്റ്റ് 30 വരെ ജില്ലയിലെ വ്യാപാരസ്ഥാപനങ്ങൾ രാത്രി 10 വരെ തുറന്ന് പ്രവർത്തിക്കുന്നതിന് അനുവദിക്കണമെന്ന് വ്യാപാരി വ്യവസായ ഏകോപന സമിതി ആവശ്യപ്പെട്ടു. മുനിസിപ്പൽ, പഞ്ചായത്ത് ലൈസൻസുകൾ പുതുക്കുന്നതിനുള്ള കാലാവധി സെപ്തംബർ 20 നീട്ടി നൽകണമെന്നും യോഗത്തിൽ ആവശ്യപ്പെട്ടു. ജില്ലാ പ്രസിഡന്റ് എം.കെ.തോമസ്‌കുട്ടി അദ്ധ്യക്ഷത വഹിച്ചു. ജനറൽ സെക്രട്ടറി എ.കെ.എൻ പണിക്കർ, ട്രഷറർ ഇ.സി.ചെറിയാൻ, വൈസ് പ്രസിഡന്റുമാരായ വി.എ.മുജീബ് റഹ്മാൻ, മാത്യു ചാക്കോ വെട്ടിയാങ്കൽ, പി.സി.അബ്ദുൾ ലത്തീഫ്, സെക്രട്ടറിമാരായ വി.സി.ജോസഫ്, കെ.ജെ.മാത്യു, ടി.കെ.രാജേന്ദ്രൻ, കെ.എ.വർഗീസ്, ഫിലിപ്പ് മാത്യു തരകൻ എന്നിവർ പങ്കെടുത്തു.