ഡബ്ലിൻ: ഐറിഷ് രാഷ്ട്രീയ നേതാവും സമാധാന നോബേൽ സമ്മാന ജേതാവുമായ ജോൺ ഹ്യൂം അന്തരിച്ചു. 83 വയസായിരുന്നു. നോർതേൺ അയർലൻഡിലെ സോഷ്യൽ ഡെമോക്രാറ്റിക് ആൻഡ് ലേബർ പാർട്ടിയുടെ (എസ്‍.ഡി.എൽ.പി) സ്ഥാപകനാണ് ജോൺ ഹ്യൂം.

പൗരാവകാശങ്ങൾക്ക് വേണ്ടിയുള്ള പ്രവർത്തനങ്ങൾക്കായി ജീവതം സമർപ്പിച്ച ഹ്യൂം,​ ഇന്നലെയാണ് വിടവാങ്ങിയത്. വർഷങ്ങളായി മറവിരോഗം ബാധിച്ച് കഴിയുകയായിരുന്നു. 1979-ലാണ് സോഷ്യൽ ഡെമോക്രാറ്റിക് പാർട്ടി രൂപീകരിച്ചത്. 2001 വരെ അദ്ദേഹം പാർട്ടിയുടെ ഉന്നത നേതാവായി തുടർന്നു. യു.കെ പാർലമെന്റിലും യൂറോപ്യൻ പാർലമെന്റിലും അംഗമായിരുന്നു. നോർതേൺ അയർലൻഡ് അസംബ്ലിയിലും അംഗമായിരുന്നു.

♦ ഹ്യൂം: സമാധാനശിൽപി

നോർതേൺ അയർലൻഡിന്റെ സമാധാന പദ്ധതിയുടെ ശിൽപിയാണ് അദ്ദേഹം. നോർതേൺ അയർലൻഡിലെ സമാധാന പ്രവർത്തനങ്ങൾക്കുള്ള അംഗീകാരമായി 1998-ൽ ഡേവിഡ് ട്രിംബിളിനൊപ്പമാണ് സമാധാനത്തിനുള്ള നൊബേൽ സമ്മാനം ലഭിച്ചത്. ഗാന്ധി സമാധാന സമ്മാനം, മാർട്ടിൻ ലൂഥർ കിംഗ് അവാർഡ് എന്നിയും ഹ്യൂമിനെ തേടിയെത്തിയിട്ടുണ്ട്. 2010-ൽ പൊതുജനങ്ങൾക്കിടയിൽ നടത്തിയ വോട്ടെടുപ്പിലൂടെ നോർതേൺ അയർലൻഡിലെ എക്കാലത്തെയും മികച്ച നേതാവായി ഹ്യൂം തിരഞ്ഞെടുക്കപ്പെട്ടിരുന്നു.