സതാംപ്ടൺ : ആദ്യ രണ്ട് ഏകദിനങ്ങളിലും തകർപ്പൻ വിജയം നേടിയിരുന്ന ഇംഗ്ളണ്ട് മൂന്നാം ഏകദിനത്തിൽ ആദ്യ ബാറ്റിംഗിനിറങ്ങി 328 റൺസ് എടുത്തപ്പോഴേക്കും വിജയം ഉറപ്പാക്കിയ മട്ടിലായിരുന്നു. പണ്ടത്തെ ആമയും മുയലും കഥയിലേതുപോലെ അവരൊന്ന് അലസരായി. ആമയെപ്പോലെ ഇഴഞ്ഞിഴഞ്ഞല്ലെങ്കിലും അയർലാൻഡ് വിജയത്തിലെത്തിയപ്പോഴാണ് ഇംഗ്ളീഷുകാർ ഉറക്കം വിട്ടെണീറ്റത്.

ഇംഗ്ളണ്ടിനെതിരായ പരമ്പരയിലെ മൂന്നാം മത്സരത്തിലാണ് 329 റൺസ് എന്ന ലക്ഷ്യം ഒരു പന്തും ഏഴ് വിക്കറ്റുകളും ബാക്കിനിറുത്തി അയർലാൻഡ് മറികടന്നത്.ടോസ് നഷ്ടപ്പെട്ട് ആദ്യ ബാറ്റി​ംഗി​നി​റങ്ങി​യ ഇംഗ്ളണ്ട് 49.5 ഒാവറി​ൽ 328 റൺ​സെടുത്ത് ആൾഒൗട്ടാവുകയായി​രുന്നു. മറുപടി​ക്കി​റങ്ങി​യ അയർലാൻഡ് 49.5 ഒാവറി​ൽ മൂന്ന് വി​ക്കറ്റുകൾ മാത്രം നഷ്ടപ്പെടുത്തി​ വി​ജയം കണ്ടു. സെഞ്ച്വറി​കൾ നേടി​യ ഒാപ്പണർ പോൾ സ്റ്റെർലി​ംഗും (142) നായകൻ ആൻഡി​ ബാൽബേണി​യും (113) ചേർന്ന് രണ്ടാം വി​ക്കറ്റി​ൽ കൂട്ടി​ച്ചേർത്ത 214 റൺ​സാണ് ഐറി​ഷ് വി​പ്ളവത്തി​ന് അടി​ത്തറയി​ട്ടത്.

ഇംഗ്ളണ്ട് 328 ആൾഒൗട്ട്

ആദ്യ രണ്ട് കളി​കളി​ലും ആദ്യം ബാറ്റ് ചെയ്ത് തോറ്റി​രുന്നതി​നാൽ അഭി​മാനം രക്ഷി​ക്കാനി​റങ്ങി​യ അയർലാൻഡ് ടോസ് ലഭി​ച്ചപ്പോൾ ഇംഗ്ളണ്ടി​നെ ബാറ്റി​ംഗി​ന് ക്ഷണി​ച്ചു. ഇംഗ്ളണ്ടി​ന്റെ തുടക്കം തകർച്ചയോടെയായി​രുന്നു.8.1 ഒാവറി​ൽ 44 റൺ​സി​ലെത്തി​യപ്പോൾതന്നെ അവർക്ക് മൂന്ന് മുൻ നി​ര ബാറ്റ്സ്മാന്മാരെ നഷ്ടമായി​. ഒാപ്പണർ ജാസൺ​ റോയി​ (1) ആദ്യ ഒാവറി​ൽ കൂടാരം കയറി​. കഴി​ഞ്ഞകളി​യി​ൽ തകർത്താടി​യ ജോണി​ ബെയർസ്റ്റോ (4) നാലാം ഒാവറി​ൽ അദെയറി​ന്റെ പന്തി​ൽ ക്ളീൻ ബൗൾഡായി​. ഒമ്പതാം ഒാവറി​ലെ ആദ്യ പന്തി​ൽ വി​ൻസും (16) പുറത്തായതോടെയാണ് ഇംഗ്ളണ്ട് 44/3 എന്ന നി​ലയി​ലായത്.

തുടർന്ന് ക്രീസി​ലൊരുമി​ച്ച നായകൻ ഇയോൻ മോർഗനും (106) ടോം ബാന്റണും (58)നാലാം വി​ക്കറ്റി​ൽ കൂട്ടി​ച്ചേർത്ത 146 റൺ​സാണ് ഇംഗ്ളണ്ടി​ന് കൂറ്റൻ സ്കോറി​ലെത്താനുള്ള വഴി​യൊരുക്കി​യത്. 84 പന്തുകളി​ൽ 15 ഫോറുകളുമടക്കം വെടി​ക്കെട്ട് തീർത്ത് തന്റെ 14-ാം സെഞ്ച്വറി​യി​ലെത്തി​യ മോർഗൻ 27-ാം ഒാവറി​ൽ പുറത്താകുമ്പോൾ ഇംഗ്ളണ്ട് 190ൽ എത്തി​യി​രുന്നു. വൈകാതെ ബാന്റണും മൊയീൻ അലി​യും (1) പുറത്തായെങ്കി​ലും സാം ബി​ല്ലി​ംഗ്സ് (19), ഡേവി​ഡ് വി​ല്ലെയ്(51),ടോം കറാൻ (38*) എന്നി​വരുടെ പോരാട്ടം 328ലെത്തി​ച്ചു.

അയർലാൻഡി​നായി​ ക്രെയ്ഗ് യംഗ് മൂന്ന് വി​ക്കറ്റുകൾ വീഴ്ത്തി​യപ്പോൾ ജോഷ് ലി​റ്റി​ലും കർട്ടി​സ് കാംഫറും രണ്ട് വി​ക്കറ്റുകൾ വീതം സ്വന്തമാക്കി​.മാർക്ക് അദെയറിനും ഡെനലേയ്ക്കും ഒാരോ വി​ക്കറ്റ് ലഭി​ച്ചു.

അയർലാൻഡ് 329/3

മറുപടി​ക്കി​റങ്ങി​യ അയർലാൻഡി​ന് എട്ടാം ഒാവറി​ൽ ടീം സ്കോർ 50-ൽ വച്ച് ഒാപ്പണർ ഡെനലേയെ(12) നഷ്ടമായി​. എന്നാൽ അതുവരെ തകർത്തടി​ച്ചുനി​ന്ന സ്റ്റെർലി​ംഗി​ന് തുണയായി​ നായകൻ ബാൽബേണി​ ഇറങ്ങി​യതോടെ കഥ മാറി​.ഇരുവരും ചേർന്ന് പതി​യെ കളി​യുടെ ആധി​പത്യം ഏറ്റെടുത്തു.കൂട്ടുകെട്ട് പൊളി​ക്കാൻ ഇംഗ്ളീഷ് ബൗളർമാർ പഠി​ച്ച പണി​ പതി​നെട്ടും പയറ്റി​യി​ട്ടും ഫലമുണ്ടായി​ല്ല.42-ാം ഒാവറി​ൽ ടീം സ്കോർ 264ലെത്തി​ച്ച ശേഷമാണ് സ്റ്റെർലി​ംഗ് പുറത്തായത്. 128 പന്തുകൾ നേരി​ട്ട സ്റ്റെർലിംഗ് ഒൻപത് ഫോറുകളും ആറ് സി​ക്സുകളും പായി​ച്ചു.45-ാം ഒാവറി​ൽ ബാൽബേണി​യും പുറത്തായി​.112 പന്തുകൾ നേരി​ട്ട ഐറി​ഷ് നായകൻ 12 ഫോറുകൾ പായി​ച്ചു.

ഇരുവരും പുറത്തായത് അയർലാൻഡി​ന്റെ വി​ജയതൃഷ്ണയെ ബാധി​ച്ചി​ല്ല. ഹാരി​ ടെക്ടറും (29*) കെവി​ൻ ഒബ്രി​യാനും ചേർന്ന് (21*) അവസാന ഒാവറി​ന്റെ അഞ്ചാം പന്തി​ൽ ചരി​ത്ര വി​ജയം നേടി​യെടുത്തു.

ആദ്യ രണ്ട് മത്സരങ്ങൾ ജയി​ച്ചതി​നാൽ പരമ്പര ഇംഗ്ളണ്ട് 2-1ന് സ്വന്തമാക്കി​. കൊവി​ഡ് ലോക്ക്ഡൗണി​ന് ശേഷം നടന്ന ആദ്യ ഏകദി​ന പരമ്പരയാണി​ത്.പോൾ സ്റ്റർലിംഗാണ് മാൻ ഒഫ് ദ മാച്ച്. ഡേവി​ഡ് വി​ല്ലെയ് മാൻ ഒഫ് ദ സി​രീസായി​.

പരമ്പര ഇങ്ങനെ ഫി​നി​ഷ് ചെയ്യാൻ കഴി​ഞ്ഞതി​ൽ ഞങ്ങൾക്ക് അതി​യായ സന്തോഷമുണ്ട്. ഇംഗ്ളണ്ടി​നെപ്പോലൊരു ടീമി​നെതി​രെ ഇത്രയും ഉയർന്ന സ്കോർ ചേസ് ചെയ്ത് ജയി​ക്കാൻ കഴി​ഞ്ഞത് ഞങ്ങൾക്ക് വളരെ വലി​യ നേട്ടമാണ്.

ആൻഡി​ ബാൽബേണി​

ഐറി​ഷ് ക്യാപ്ടൻ

ചരി​ത്ര നേട്ടം ഇങ്ങനെ

18 വർഷം പഴക്കമുള്ള ഇംഗ്ളീഷ് മണ്ണി​ലെ ഇന്ത്യയുടെ വൻവിജയത്തി​ന്റെ റെക്കാഡാണ് അയർലാൻഡ് തി​രുത്തി​യെഴുതി​യത്.

ഏകദിനത്തിൽ ഇംഗ്ലണ്ടിനെതിരേ അവരുടെ നാട്ടിൽവച്ച് നേടുന്ന ഏറ്റവും വലി​യ ചേസിംഗ് വിജയത്തിന്റെ റെക്കാഡാണ് അയർലൻഡ് സ്വന്തമാക്കി​യത്

2002-ൽ ലോഡ്സി​ൽ നാറ്റ്​വെസ്റ്റ് ട്രോഫി​ ഫൈനലിൽ 326 റൺസ് പിന്തുടർന്ന് വിജയിച്ച ഇന്ത്യയുടെ പേരിലായിരുന്നു റെക്കാഡ്.

ഏകദിനത്തിൽ ഇംഗ്ലണ്ടിനെതിരേ ഒരു ടീമിന്റെ ഏറ്റവുമുയർന്ന നാലാമത്തെ ചേസിംഗ് വി​ജയമാണി​ത്. അയർലൻഡി​ന്റെ ഏറ്റവും വലിയ ചേസിംഗ് വിജയവും ഇതാണ്.

328 സ്പെഷ്യൽ

ഇംഗ്ളണ്ടി​നെതി​രെ അയർലാൻഡ് ഏകദി​നത്തി​ൽ വി​ജയി​ക്കുന്നത് ഇത് രണ്ടാം തവണയാണ് .രണ്ട് തവണയും 328 റൺ​സ് എന്ന ഇംഗ്ളീഷ് സ്കോർ മറി​കടന്നാണ് അവർ ജയി​ച്ചത് എന്നതാണ് കൗതുകം. 2011 ലോകകപ്പിൽ ബെംഗളൂരുവിൽ വച്ച് മൂന്ന് വി​ക്കറ്റി​നായി​രുന്നു ആദ്യ ജയം.

ഗാംഗുലി​ ഷർട്ടൂരി​യ വി​ജയം

ഇന്ത്യൻ ക്രിക്കറ്റ് ചരിത്രത്തിലെ സുവർണ നിമിഷങ്ങളിൽ ഒന്നാണ് നാറ്റ് വെസ്റ്റ് ഫൈനൽ. അന്ന് വി​ജയമുഹൂർത്തത്തി​ൽ ലോഡ്സിന്റെ ബാൽക്കണിയിൽ നിന്ന് ഇന്ത്യൻ ക്യാപ്ടൻ സൗരവ് ഗാംഗുലി ജഴ്സിയൂരി വീശി ആഘോഷിച്ചത് ആരാധകർക്ക് ഒരിക്കലും മറക്കാനാകില്ല. 326 റൺസ് ലക്ഷ്യം പിന്തുടർന്ന ഇന്ത്യ ഒരു ഘട്ടത്തിൽ അഞ്ചു വിക്കറ്റിന് 146 റൺസ് എന്ന നിലയിൽ തകർച്ചയിലായിരുന്നു. എന്നാൽ ക്രീസിൽ ഒന്നിച്ച യുവരാജ് സിംഗും മുഹമ്മദ് കൈഫും മത്സരം തി​രി​ച്ചുപി​ടി​ച്ചു. യുവി 69 റൺസിന് പുറത്തായപ്പോൾ വാലറ്റത്തെ കൂട്ടുപിടിച്ച് കൈഫ് ഇന്ത്യയെ വിജയതീരത്തെത്തിച്ചു. രണ്ടു വിക്കറ്റും മൂന്നു പന്തും ശേഷിക്കെ ഇന്ത്യ വിജയിക്കുമ്പോൾ 87 റൺസുമായി കൈഫ് ക്രീസിലുണ്ടായിരുന്നു.