മുംബയ്: കുട്ടികളുടെ കുസൃതികൾ പലപ്പോഴും മാതാപിതാക്കൾക്ക് തലവേദനകൾ ഉണ്ടാക്കാറുണ്ട്. പക്ഷേ,​ അത് പൊലീസ് കേസൊക്കെ ആകുന്നത് വളരെ അപൂർവമാണ്. എന്നാൽ മുംബയിൽനിന്നുള്ള ഒരു ഭീഷണി സന്ദേശത്തിന്റെ പിന്നിലെ കഥ കേട്ടാൽ ഞെട്ടിപ്പോകും.

120ലക്ഷം രൂപ നൽകണമെന്നും, അല്ലെങ്കിൽ കുടുംബത്തിലെ എല്ലാവരെയും കൊല്ലുമെന്നുമായിരുന്നു ചൈനയിൽ ചാർട്ടേഡ് അക്കൗണ്ടന്റായി ജോലിചെയ്യുന്ന മുംബയ് സ്വദേശിക്ക് വന്ന ഇ-മെയിൽസന്ദേശം. ഒരു ലക്ഷം ആവശ്യപ്പെട്ടാണ് ഇയാൾക്ക് ആദ്യം ഇ-മെയിൽ വന്നത്. പിന്നാലെ 12 മില്യൺ നൽകണമെന്നും ആമസോൺ പേയിലോ പേടിഎമ്മിലോ പണം നൽകിയാൽ മതിയെന്നും, തുക നൽകിയില്ലെങ്കിൽ തങ്ങളുടെ ആളുകൾ മുംബയിലുണ്ടെന്നും അവർ നിങ്ങളെയും കുടുംബത്തെയും കൊല്ലുമെന്നുമുള്ള സന്ദേശവുമെത്തി. മൂന്നാമത്തെ ഇ-മെയിലിലും ഇതാവർത്തിച്ചു. ഇതുകണ്ട് ശരിക്കും വിരണ്ടുപോയ അദ്ദേഹം ഉടൻതന്നെ ബോറിവാലി പൊലീസ് സ്റ്റേഷനിൽ പരാതി നൽകി.

പൊലീസ് കേസ് ക്രൈംബ്രാഞ്ചിന് കൈമാറി. പിന്നാലെ സൈബർ വിദഗ്ദ്ധർ ഇ-മെയിൽ വന്ന ഐ.പി അഡ്രസ് പരിശോധിച്ചു. പരാതിക്കാരന്റെ വീട്ടിലെ ഐ.പി അഡ്രസ് തന്നെയെന്ന് കണ്ടെത്തിയതോടെ പൊലീസിന് പന്തികേട് മണത്തു.

വീട്ടുകാരെ വിശദമായി ചോദ്യംചെയ്തു. ഒടുവിൽ പ്രതിയെ കിട്ടി,​ പരാതിക്കാരന്റെ 12 കാരിയായ മകൾ!.

മാതാപിതാക്കൾ മൂന്ന് വയസുള്ള കുഞ്ഞനിയനെ, തന്നെക്കാളേറെ സ്നേഹിക്കുന്നതിനാൽ അവരെ ഒരു പാഠം പഠിപ്പിക്കാനാണ് ഇ-മെയിൽ അയച്ചതെന്ന് പെൺകുട്ടി പൊലീസിനോട് സമ്മതിച്ചു.

എന്തായാലും കേസിലെ 'പ്രതിയെ' കണ്ടെത്തിയെങ്കിലും പൊലീസ് അറസ്റ്റിലേക്കൊന്നും നീങ്ങിയില്ല. പെൺകുട്ടിയെ കൗൺസിലിംഗിന് വിധേയയാക്കാനാണ് പൊലീസ് നൽകിയ നിർദേശം.