ആലപ്പുഴ: കുട്ടനാട്ടിൽ ജലനിരപ്പ് ഉയർന്നു പല പാടശേഖരങ്ങളും മടവീഴ്ച ഭീഷണി നേരിടുന്നതിനാൽ ബണ്ട് ബലപ്പെടുത്തി കൃഷി സംരക്ഷിക്കുന്നതിന് കൃഷി വകുപ്പിന് മണ്ണ് നൽകും. കനാൽ നവീകരണം വഴി ലഭിച്ച മണ്ണും ചെളിയും കോമളപുരത്ത് ശേഖരിച്ചിട്ടുണ്ട്. ഇതിൽ നിന്നും ഇറിഗേഷൻ വകുപ്പ് വേണ്ടത്ര മണ്ണ് കൃഷിവകുപ്പിന് കൈമാറും. ഇതിനായി മണ്ണ് ആവശ്യപ്പെട്ടു കൊണ്ട് പ്രിൻസിപ്പൽ അഗ്രികൾച്ചർ ഓഫീസർ, ഇറിഗേഷൻ എക്സിക്യൂട്ടീവ് എൻജിനീയർക്ക് കത്ത് നൽകാൻ ജില്ലാ കളക്ടർ എ.അലക്സാണ്ടർ ബന്ധപ്പെട്ടവർക്ക് നിർദ്ദേശം നൽകി.

ആദ്യഘട്ടമായി 50 ലോഡ് മണ്ണ് ഇത്തരത്തിൽ ഇറിഗേഷൻ വകുപ്പ് കൃഷി വകുപ്പിന് നൽകും. പാടശേഖരങ്ങളിൽ നിന്നുള്ള ആവശ്യമനുസരിച്ച് കൃഷി വകുപ്പ് ഇറിഗേഷൻ വകുപ്പിൽ നിന്ന് മണ്ണ് ലഭ്യമാക്കി നൽകും. ചാക്കിൽ മണൽ നിറച്ച് ബണ്ട് ബലപ്പെടുത്തുന്നതിനുവേണ്ടി വിവിധ പാടശേഖരങ്ങളിലെ നിന്ന് ആവശ്യം ഉയർന്നതിനെത്തുടർന്ന് കളക്ടർ വിളിച്ച യോഗത്തിലാണ് തീരുമാനമുണ്ടായത്.