മുംബയ്: അഫ്ഗാനിസ്ഥാനിൽ നിന്ന് കടത്തിയ വൻ ലഹരിമരുന്ന് ശേഖരം മുംബയിൽ പിടികൂടി. നവി മുംബയിലെ തുറമുഖത്ത് നിന്നാണ് 191 കിലോഗ്രാം ഹെറോയിൻ പിടിച്ചെടുത്തത്. ഇതിന് ആയിരം കോടി രൂപയോളം വിലമതിക്കുമെന്ന് കസ്റ്റംസ്, ഡി.ആർ.ഐ അധികൃതർ അറിയിച്ചു.

രഹസ്യവിവരം ലഭിച്ചതിനെ തുടർന്നാണ് കസ്റ്റംസും ഡി.ആർ.ഐ.യും തുറമുഖത്ത് പരിശോധന നടത്തിയത്. ആയുർവേദ മരുന്നുകളെന്ന പേരിലാണ് ഹെറോയിൻ തുറമുഖത്ത് ഇറക്കിയിരുന്നത്. എന്നാൽ വിശദമായി പരിശോധിച്ചപ്പോൾ പ്ലാസ്റ്റിക് പൈപ്പുകളും അതിനുള്ളിൽ ഹെറോയിനും കണ്ടെത്തുകയായിരുന്നു.

അഫ്ഗാനിസ്ഥാനിൽ നിന്ന് ഇറാൻ വഴിയാണ് ലഹരിമരുന്ന് മുംബയിലെത്തിയത്. സംഭവവുമായി ബന്ധപ്പെട്ട് രണ്ട് കസ്റ്റംസ് ഹൗസ് ഏജന്റുമാരെ അറസ്റ്റ് ചെയ്തിരുന്നു. ഇവരെ ജുഡിഷ്യൽ കസ്റ്റഡിയിൽ റിമാൻഡ് ചെയ്തു.