ന്യൂഡൽഹി: മുൻ രാഷ്ട്ര‌പതി പ്രണബ് മുഖർജിയുടെ ആരോഗ്യനില ഗുരുതരമായി തുടരുന്നുവെന്ന് മെഡിക്കൽ ബുള്ളറ്റിൻ. തലച്ചോറിൽ രക്തം കട്ടപിടിച്ചതിനെ തുടർന്ന് ശസ്ത്രക്രിയ നടത്തിയ അദ്ദേഹത്തിന്റെ ആരോഗ്യനില മാറ്റമില്ലാതെ തുടരുകയാണ്. നിലവിൽ വെന്റിലേറ്ററിലാണ് അദ്ദേഹം. ശസ്ത്രക്രിയക്ക് മുന്നോടിയായി നടന്ന പരിശോധനയിൽ മുൻ രാഷ്ട്രപതിക്ക് കൊവിഡ് സ്ഥിരീകരിച്ചിരുന്നു. ഡൽഹിയിലെ റിസർച്ച് ആൻഡ് റഫറൽ സൈനിക ആശുപത്രിയിലാണ് പ്രണബ് മുഖർജി ചികിത്സയിൽ കഴിയുന്നത്.
വലിയതോതിലാണ് തലച്ചോറിൽ രക്തം കട്ടപിടിച്ചതെന്നാണ് ആശുപത്രി അധികൃതർ അറിയിച്ചത്. 84കാരനായ മുൻ രാഷ്ട്രപതിയുടെ ആരോഗ്യനില പരിശോധിക്കാനായി ഡോക്‌ടർമാരുടെ സംഘം രൂപീകരിച്ചിട്ടുണ്ട്‌. ഇന്നലെ രാത്രിയോടെ പ്രതിരോധമന്ത്രി രാജ്‌നാഥ് സിംഗ് ആശുപത്രിയിലെത്തി ബന്ധുക്കളും ഡോക്ടർമാരുമായി ചർച്ച നടത്തിയിരുന്നു.
ഉപരാഷ്ട്രപതി വെങ്കയ്യ നായിഡു,കോൺഗ്രസ് മുൻ അദ്ധ്യക്ഷൻ രാഹുൽഗാന്ധി, വിവിധ കേന്ദ്രമന്ത്രമാർ തുടങ്ങിയവർ പ്രണബ്‌മുഖർജിക്ക് ആയുരാരോഗ്യം നേർന്ന് ട്വീറ്റ് ചെയ്‌തിരുന്നു. കഴിഞ്ഞയാഴ്ച താനുമായി ഇടപഴകിയവർ സ്വയം സമ്പർക്കവിലക്കിൽ പോകണമെന്നും കൊവിഡ് പരിശോധന നടത്തണമെന്നും പ്രണബ് മുഖർജിയുടെ ഔദ്യോഗിക അക്കൗണ്ടിൽ നിന്ന് ട്വീറ്റ് വന്നിരുന്നു.