തിരുവനന്തപുരം: ശ്രീ ചട്ടമ്പിസ്വാമിയുടെ 167-ാം ജയന്തിയോടനുബന്ധിച്ച് ശ്രീ ചട്ടമ്പി സ്വാമി സാംസ്കാരിക സമിതി എർപ്പെടുത്തിയ ജയന്തി പുരസ്കാരം പ്രതിപക്ഷ നേതാവ് രമേശ് ചെന്നിത്തലയ്ക്ക് സമ്മാനിക്കും. ഇരുപത്തിഅയ്യായിരം രൂപയും ഫലകവും പ്രശസ്തിപത്രവും അടങ്ങുന്നതാണ് പുരസ്‌ക്കാരം.
പെരുമ്പടവം ശ്രീധരൻ ചെയർമാനും സൂര്യകൃഷ്ണമൂർത്തി, ഡോ. എം.ആർ തമ്പാൻ എന്നിവർ അംഗങ്ങളായുള്ള സമിതിയാണ് പുരസ്‌ക്കാര ജേതാവിനെ തിരഞ്ഞെടുത്തത്.പൊതുജീവിതത്തിന്റെ സമസ്തമേഖലകളിലേയും പ്രശ്നങ്ങളിൽ ഇടപെടുകയും പരിഹാരത്തിനായി ആത്മാർത്ഥമായി പരിശ്രമിക്കുകയും ചെയ്യുന്ന രമേശ് ചെന്നിത്തലയുടെ കാര്യക്ഷമവും ഊർജ്ജസ്വലവുമായ നേതൃപാടവം പരിഗണിച്ചാണ് പുരസ്‌ക്കാരം നൽകുവാൻ തീരുമാനിച്ചതെന്ന് പുരസ്‌ക്കാര സമിതി അറിയിച്ചു.
ആഗസ്റ്റ് 24-ന് തിരുവനന്തപുരത്ത് കൊവിഡ് പ്രോട്ടോക്കോൾ പ്രകാരം നടത്തുന്ന ഹ്രസ്വമായ ചടങ്ങിൽ പുരസ്‌ക്കാര സമർപ്പണം നടത്തുമെന്ന് സമിതി പ്രസിഡന്റ് എസ്.ആർ.കൃഷ്ണകുമാറും വൈസ് പ്രസിഡന്റ് ഡോ. ശ്രീവത്സൻ നമ്പൂതിരിയും അറിയിച്ചു.