തിരുവനന്തപുരം: സംസ്ഥാനത്തെ കൊവിഡ് പ്രതിരോധം ശക്തമാക്കാന്‍ പൊലീസ് സേനയ്ക്ക് നിര്‍ദേശം നൽകി ഡി.ജി.പി ലോകനാഥ് ബെഹ്റ. തിരുവനന്തപുരം, ആലപ്പുഴ, മലപ്പുറം ജില്ലകളിൽ പ്രകടമായ നടപടി വേണം.ക്വാറന്റീനിലുള്ളവര്‍ അത് പാലിക്കുന്നുവെന്ന് ഉറപ്പ് വരുത്തണം. എല്ലാ പ്രധാന മാർക്കറ്റുകളിലും മാർക്കറ്റ് മാനേജ്മെന്റ് നടപ്പിലാക്കണം തുടങ്ങിയ നിർദേശങ്ങളാണ് ബെഹ്റ നൽകിയത്. ഉന്നതതല പൊലീസ് യോഗത്തിലാണ് ഇതു സംബന്ധിച്ച് തീരുമാനമായത്.

അതേസമയം സംസ്ഥാനത്ത് ഇന്ന് 1417 പേര്‍ക്കാണ് കൊവിഡ് സ്ഥിരീകരിച്ചത്. 1426 പേര്‍ രോഗമുക്തി നേടുകയും ചെയ്തു.ഇന്ന് 1242 പേര്‍ക്ക് സമ്പര്‍ക്കത്തിലൂടെയാണ് രോഗം ബാധിച്ചത്. ഇതില്‍ 105 പേരുടെ ഉറവിടം വ്യക്തമല്ല. ഇന്ന് 25 പുതിയ ഹോട്ട് സ്‌പോട്ടുകളാണുളളത്.കേരളത്തിൽ കൊവിഡ് രൂക്ഷമാകുന്ന സാഹചര്യത്തിൽ പ്രതിരോധ നടപടി ശക്തമാക്കാനാണ് പൊലീസിന്റെ നീക്കം.