ന്യൂഡൽഹി: പ്രധാനമന്ത്രി നരേന്ദ്ര മോദിക്കെതിരെ പരിഹാസവുമായി കോൺഗ്രസ് നേതാവ് രാഹുൽ ഗാന്ധി. ഇന്ത്യയുടെ ജി.ഡി.പി 1947ന് ശേഷമുള്ള ഏറ്റവും താഴ്ന്ന നിലയിലെത്തുമെന്ന് ഇൻഫോസിസ് സ്ഥാപകൻ എൻ.ആർ. നാരായണ മൂർത്തി കഴിഞ്ഞ തിങ്കളാഴ്ച മുന്നറിയിപ്പ് നൽകിയിരുന്നു. ഇത് ചൂണ്ടിക്കാട്ടിയാണ് പ്രധാനമന്ത്രിയെ രാഹുൽ ഗാന്ധി പരിഹസിച്ചത്. 2019 ൽ ബി.ജെ.പിയുടെ ലോകസഭാ തിരഞ്ഞെടുപ്പ് മുദ്രാവാക്യം ഉപയോഗിച്ചാണ് രാഹുൽ മോദിയെ പരിഹസിച്ചത്.

"മോദി ഉണ്ടെങ്കില്‍ എല്ലാം സാധ്യമാണ്" എന്ന് രാഹുൽ ട്വീറ്റ് ചെയ്തു". മൂർത്തിയുടെ മുന്നറിയിപ്പിനെക്കുറിച്ചുള്ള വാർത്താ റിപ്പോർട്ടിന്റെ സ്ക്രീൻ ഷോട്ടും ട്വീറ്റിൽ അദ്ദേഹം ഉൾപ്പെടുത്തി. രാജ്യത്തിന്റെ ജി.ഡി.പി സ്വാതന്ത്ര്യലബ്ധിക്കു ശേഷമുള്ള ഏറ്റവും താഴ്ന്ന നിലയിലെത്തുമെന്ന് നാരായണ മൂർത്തി ആശങ്ക പ്രകടിപ്പിച്ചിരുന്നു. ജി.ഡി.പി ചുരുങ്ങിയത് അഞ്ചു ശതമാനമെങ്കിലും കുറയും. 1947ന് ശേഷമുള്ള ഏറ്റവും താഴ്ന്ന നിലയിയിൽ ജി.ഡി.പി എത്തിച്ചേരുമെന്ന ആശങ്കയുണ്ടെന്നും മൂർത്തി വ്യക്തമാക്കിയിരുന്നു.