അമലാ പോൾ നായികയായെത്തിയ ആടൈ ആരാധകർക്കിടയിൽ ഏറെ ശ്രദ്ധ നേടിയ ചിത്രമാണ്. ചിത്രം തമിഴിൽ റിലീസ് ചെയ്തതിന് പിന്നാലെ ഹിന്ദിയിലേക്ക് റീമേക്ക് ചെയ്യുന്നുവെന്ന റിപ്പോർട്ടുകളാണ് ഇപ്പോൾ പുറത്തു വരുന്നത്. ശ്രദ്ധാ കപൂറാണ് ചിത്രത്തിൽ നായികയായെത്തുന്നത്. ആടൈ സംവിധായകൻ രത്നകുമാർ തന്നെയാണ് ചിത്രം ഹിന്ദിയിൽ ഒരുക്കുകയെന്നും ഇന്ത്യ ടുഡേ റിപ്പോർട്ട് ചെയ്യുന്നു.

ചിത്രം ഹിന്ദിയിലേക്ക് റീമേക്ക് ചെയ്യുമെന്നും കങ്കണ നായികയായി എത്തുമെന്നും നേരത്തെ അഭ്യൂഹങ്ങൾ ഉണ്ടായിരുന്നുവെങ്കിലും ചിത്രത്തിന്റെ നിർമാതാവായ അരുൺ പാണ്ഡ്യൻ ഇത് സത്യമല്ലെന്ന് വ്യക്തമാക്കിയിരുന്നു.

2019 ജൂലായ് 19 നാണ് ആടൈ പുറത്തിറങ്ങിയത്. സമാന കഥാപാത്രങ്ങളുളള കുറെയധികം ചിത്രങ്ങൾ മുന്നിലെത്തിത്തുടങ്ങിയപ്പോൾ അഭിനയം നിറുത്താൻ ഒരുങ്ങിനിന്ന തന്നെ സിനിമയിൽ പിടിച്ചുനിറുത്തിയ ചിത്രമാണ് ആടൈ എന്ന് അമല പോൾ നേരത്തെ പറഞ്ഞിരുന്നു. കാമിനി എന്ന കഥാപാത്രത്തെയാണ് അമല ചിത്രത്തിൽ അവതരിപ്പിച്ചത്. ചിത്രത്തിലെ ചില രം​ഗങ്ങൾക്കെതിരേ വിവാദം ഉയർന്നുവന്നിരുന്നു. നഗ്നത കാണിച്ച് സിനിമ വിൽക്കുന്നുവെന്ന ആരോപണവുമായി ചിത്രത്തിന്റെ അണിയറ പ്രവർത്തകർക്കെതിരെ ചിലർ രംഗത്ത് വന്നിരുന്നു. അമലക്കെതിരേയും സാമൂഹിക മാദ്ധ്യമങ്ങളിൽ ഒട്ടനവധി പേർ വിമർശനമുയർത്തിയിരുന്നു.

എല്ലാവരെയും ഞെട്ടിച്ചുകൊണ്ടായിരുന്നു ആടൈയുടെ ടീസർ റിലീസ് ചെയ്തത് . യൂട്യൂബ് ട്രെൻഡിങ്ങിൽ ഒന്നാമതായെത്തുകയു ചെയ്തു. ഫസ്റ്റ്ലുക്ക് പുറത്തിറങ്ങിയത് മുതൽ ചിത്രം വലിയ ചർച്ചാ വിഷയമായി മാറിയിരുന്നു. ആടൈയിൽ അഭിനയിക്കാൻ പല മുൻനിര നായികമാരും വിസമ്മതമറിയിച്ചിരുന്നു. ഏറ്റവുമൊടുവിലാണ് കഥാപാത്രം അമലയെ തേടിയെത്തുന്നത്.