തിരുവനന്തപുരം: പൂജപ്പുരയിലെ ജയിൽ ആസ്ഥാനം മൂന്ന് ദിവസത്തേക്ക് അടച്ചു. സെൻട്രൽ ജയിലിൽ നിന്നും ജയിൽ ആസ്ഥാന കാര്യാലയത്തിൽ ശുചീകരണത്തിനായി നിയോഗിച്ചിരുന്ന രണ്ട് തടവുകാർക്ക് കൊവിഡ് രോഗലക്ഷണങ്ങൾ കണ്ടതിനെ തുടർന്നാണ് നടപടി. ആരോഗ്യ വകുപ്പിന്റെ നിർദ്ദേശപ്രകാരമാണ് 3 ദിവസത്തേക്ക് ജയിൽ ആസ്ഥാനം അടച്ചിടാൻ തീരുമാനിച്ചതെന്ന് വകുപ്പ് മേധാവി ഋഷിരാജ് സിംഗ് പറഞ്ഞു.

അണുനശീകരണം പൂർത്തിയാക്കിയ ശേഷമാകും ആസ്ഥാനം വീണ്ടും തുറക്കുക. പൂജപ്പുര സെൻട്രൽ ജയിലിലും കൊവിഡ് ആശങ്ക തുടരുകയാണ്. ഇന്നലെ 41 തടവുകാർക്കും ഉദ്യോഗസ്ഥനും അടക്കം കൊവിഡ് സ്ഥിരീകരിച്ചിരുന്നു. ഇതോടെ ജയിലിൽ ആകെ കൊവിഡ് ബാധിച്ച തടവുകാരുടെ എണ്ണം 92 ആയി. കൂടുതൽ ആന്റിജൻ പരിശോധന നടത്താനാണ് അധികൃതർ ആലോചിക്കുന്നത്. പൂജപ്പുര ജയിലിലുള്ള 975 തടവുകാർക്കും ടെസ്റ്റ് നടത്താനാണ് ജയിൽ വകുപ്പ് തീരുമാനം.