തിരുവനന്തപുരം: ആഡംബര കാറുകളോട് ഒടുങ്ങാത്ത ഭ്രമമുളള വിവാദ വ്യവസായി റോയ് കുര്യൻ പുത്തൻ കാറുമായി വീണ്ടുമെത്തി. ബെൻസും ഔഡിയുമൊന്നുമല്ല; സാക്ഷാൽ റോൾസ് റോയിസ് ഗോസ്റ്റാണ് കക്ഷി ഇത്തവണ സ്വന്തമാക്കിയിരിക്കുന്നത്. ഇതിലാണ് ഇപ്പോഴത്തെ കറക്കവും. 2011 മോഡൽ ഗോസ്റ്റ് കർണാടക രജിസ്ട്രേഷനാണ്. പുതിയ ഗോസ്റ്റിന്റെ ഓൺറോഡ് വില ഏകദേശം 5.25 കോടി രൂപയാണ്. പുതിയ കാറിനെക്കുറിച്ച് പഠിച്ചുവരുന്നതേ ഉളളൂ എന്നാണ് അഭിമുഖ വീഡിയോയിൽ അദ്ദേഹം പറയുന്നത്. വീഡിയാേ സോഷ്യൽ മീഡിയയിൽ വൈറലാണ്. അമേരിക്കൻ പ്രസിഡന്റ് ഉപയോഗിക്കുന്ന കാഡിലാക്ക് എടുക്കണമെന്നതാണ് റോയ് കുര്യന്റെ അടുത്ത ആഗ്രഹം. അതിന്റെ പണിപ്പുരയിലാണത്രേ കക്ഷി. റോൾസ് റോയിസ് വാങ്ങിയത് പൊലീസിനോടുളള വെല്ലുവിളിയല്ലെന്നും ഒരിക്കലും വെല്ലുവിളി തന്റെ ജീവിതത്തിലുളള കാര്യമല്ലെന്നും അദ്ദേഹം പറയുന്നുണ്ട്.

കൊവിഡ് മാനദണ്ഡങ്ങൾ ലംഘിച്ച് ബെല്ലി ഡാൻസ് നടത്തിയതിലൂടെയും പുതിയ ബെൻസും ലോറികളും വാങ്ങിയതിനെ തുടർന്ന് റോഡ്ഷോ നടത്തിയതിലൂടെയുമാണ് റോയ് കുര്യൻ വിവാദങ്ങളിൽ ഇടം പിടിച്ചത്. റോഡ് ഷോയ്ക്കിടെ രജിസ്ട്രേഷൻ പോലും നടത്താത്ത അദ്ദേഹത്തിന്റെ വാഹനങ്ങൾ അധികൃതർ പിടിച്ചെടുത്തിരുന്നു. മഴയും വെയിലുമേറ്റ് ഈ വാഹനങ്ങൾ പൊലീസ് സ്റ്റേഷനിൽ കിടക്കുന്നതിന്റെ ദൃശ്യങ്ങളും സോഷ്യൽ മീഡിയിയിൽ പ്രചരിച്ചിരുന്നു. ഇന്ത്യയിൽ ആദ്യമായി ഡെലിവറി നടത്തിയ ബെൻസ് ജി എൽ ഇ സീരീസിലുളള കാറിനാണ് ഈ ദുർഗതി ഉണ്ടായതെന്ന് ഓർക്കണം. എന്നാൽ ഇതൊന്നും തനിക്കൊരു പ്രശ്നമല്ലെന്ന നിലപാടിലാണ് റോയ് കുര്യൻ. നിരവധി ആഡംബരക്കാറുകൾ സ്വന്തമായുളള തനിക്ക് പുതുപുത്തൻ ബെൻസ് തിരക്കിട്ട് സ്റ്റേഷനിൽ നിന്ന് ഇറക്കേണ്ട ആവശ്യമില്ലെന്നും അദ്ദേഹം പറഞ്ഞിരുന്നു.