ന്യൂയോർക്ക്: ലോകത്ത് കൊവിഡ് ബാധിതരുടെ എണ്ണം 21,592,599 ആയി ഉയർന്നു. ഇതുവരെ 767,956 പേരാണ് വൈറസ് ബാധമൂലം മരണമടഞ്ഞത്. രോഗമുക്തി നേടിയവരുടെ എണ്ണം 14,315,075 ആയി എന്നത് ആശ്വാസം നൽകുന്നു. അമേരിക്കയിൽ പുതുതായി അരലക്ഷത്തോളം പേർക്കാണ് കൊവിഡ് സ്ഥിരീകരിച്ചത്.

അമേരിക്കയിൽ രോഗബാധിതരുടെ എണ്ണം അമ്പത്തഞ്ച് ലക്ഷം പിന്നിട്ടു. 172,606 മരണങ്ങളും റിപ്പോർട്ട് ചെയ്തു. 2,900,187 പേർ സുഖം പ്രാപിച്ചു. ബ്രസീലിലും സ്ഥിതി ഗുരുതരമായി തുടരുകയാണ്. ആകെ രോഗബാധിതരുടെ എണ്ണം 33 ലക്ഷം പിന്നിട്ടു. രാജ്യത്ത് കഴിഞ്ഞ ദിവസം മുപ്പത്തെട്ടായിരത്തോളം പേർക്കാണ് രോഗം സ്ഥിരീകരിച്ചത്. മരണസംഖ്യ 107,297 ആയി ഉയർന്നു. 2,404,272 പേർ രോഗമുക്തി നേടി.

ഇന്ത്യയിലും കൊവിഡ് വ്യാപനം രൂക്ഷമാവുകയാണ്. രാജ്യത്ത് രോഗബാധിതരുടെ എണ്ണം ഇരുപത്തിയാറ് ലക്ഷത്തോട് അടുക്കുകയാണ്. വേൾഡോമീറ്ററിന്റെ കണക്ക് പ്രകാരം ഇന്ത്യയിൽ മരണസംഖ്യ അരലക്ഷം കടന്നു.പ്രതിദിന രോഗ വർദ്ധന ഏറ്റവും കൂടുതൽ ഇന്ത്യയിലാണ്.

അതേസമയം,ന്യൂസിലാൻഡിൽ കൊവിഡ് കേസുകൾ വീണ്ടും വർദ്ധിക്കുകയാണ്. പ്രഭവ കേന്ദ്രമായ ഓക്ക്ലാൻഡിൽ ലോക്ക്ഡൗൺ നിയന്ത്രണങ്ങൾ 12 ദിവസം കൂടി നീണ്ടേക്കുമെന്ന് സർക്കാർ വൃത്തങ്ങൾ നേരത്തെ അറിയിച്ചിരുന്നു. ഫ്രാൻസ് തലസ്ഥാനമായ പാരിസിൽ കൊവിഡ് വ്യാപനം വീണ്ടും ആരംഭിച്ചു.