ശബരിമല: ചിങ്ങമാസ പൂജകൾക്കായി ശബരിമല നട തുറന്നു. ഇന്നലെ വൈകിട്ട് 5 ന് ക്ഷേത്രതന്ത്രി കണ്ഠരര് രാജീവരരുടെ മുഖ്യ കാർമ്മികത്വത്തിൽ ക്ഷേത്ര മേൽശാന്തി എ.കെ.സുധീർ നമ്പൂതിരി ക്ഷേത്ര ശ്രീകോവിൽ നട തുറന്ന് ദീപങ്ങൾ തെളിച്ചു.ദേവസ്വം ബോർഡ് പ്രസിഡന്റ് അഡ്വ.എൻ.വാസു, ദേവസ്വം കമ്മീഷണർ ബി.എസ്.തിരുമേനി, ശബരിമല സ്‌പെഷ്യൽ കമ്മീഷണർ മനോജ് തുടങ്ങിയവർ ദർശനത്തിനെത്തിയിരുന്നു.ഇന്നലെ ക്ഷേത്രത്തിൽ പ്രത്യേക പൂജകളൊന്നും ഉണ്ടായിരുന്നില്ല. ഇന്ന് പുലർച്ചെ 5 ന് ശ്രീകോവിൽ നട തുറന്നു.മഹാഗണപതി ഹോമം, ഉഷപൂജ. തുടങ്ങിവയ്‌ക്ക് ശേഷം 10 ന് നട അടയ്ക്കും.വൈകിട്ട് വൈകിട്ട് 5ന് നടതുറക്കും. ഇന്ന് മുതൽ 21 വരെ പതിവ് പൂജകൾ മാത്രമേ ഉണ്ടാവുകയുള്ളൂ. 21 ന് രാത്രി 7.30 ന് ഹരിവരാസനം പാടി നട അടയ്ക്കുന്നതോടെ ചിങ്ങമാസ പൂജകൾക്ക് പരിസമാപ്തിയാകും. കൊവിഡ് നിയന്ത്രണങ്ങളുടെ പശ്ചാത്തലത്തിൽ ഈ മാസവും ഭക്തർക്ക് അനുമതി ഇല്ല. ഓണക്കാലത്തെ പൂജകൾക്കായി 29 മുതൽ സെപ്റ്റംബർ 2 വരെ നടതുറക്കും.ഓണം നാളുകളിൽ പതിവുപോലെ ഓണസദ്യയും ഉണ്ടാകും.