തിരുവനന്തപുരം: സംസ്ഥാനത്ത് ഇന്ന് കൊവിഡ് ബാധിച്ച് മരിച്ചവരുടെ എണ്ണം ഒമ്പതായി. തിരുവനന്തപുരം, കോഴിക്കോട്, എറണാകുളം, കോട്ടയം, മലപ്പുറം, കാസർകോട് സ്വദേശികളാണ് മരിച്ചത്. കോഴിക്കോട് റൂറൽ എസ്.പി ഓഫീസ് ജീവനക്കാനായ ഷാഹിൻ ബാബു

(47), മാവൂർ സ്വദേശി സുലു(49), കളമശ്ശേരി മെഡിക്കൽ കോളേജിൽ ചികിത്സയിലായിരുന്ന ആലുവ തായ്‌ക്കാട്ടുകാര സദാനന്ദൻ(57), മൂത്തകുന്നം കോട്ടുവളളിക്കാട് തറയിൽ വൃന്ദ ജീവൻ (54), തിരുവല്ല സ്വദേശി ഏനത്ത് രാഘവൻ നായർ (80) മഞ്ചേരി മെഡിക്കൽകോളേജിൽ ചികിത്സയിലായിരുന്ന മലപ്പുറം പൂക്കോട്ടൂർ സ്വദേശി ഇല്യാസ് (47), എസ് എ ടി ആശുപത്രിയിൽ ചികിത്സയിലായിരുന്ന ചെന്നൈ സ്വദേശിനി വിജയ (31), തിരുവനന്തപുരം മെഡിക്കൽ കോളേജിൽ ചികിത്സയിലുണ്ടായിരുന്ന കാട്ടാക്കട സ്വദേശി പ്രതാപൻ ചന്ദ്രൻ (62), കാസർകോട് സ്വദേശി ലീല എന്നിവരാണ് മരിച്ചത്.

ഷാഹിൻ ബാബു ഓഗസ്റ്റ് 13 മുതൽ കൊവിഡ് ബാധിച്ച് ചികിത്സയിലായിരുന്നു. മറ്റ് ആരോഗ്യ പ്രശ്നങ്ങൾ ഉണ്ടായിരുന്നില്ല. സുലു അർബുദ രോഗിയായിരുന്നു എന്നാണ് റിപ്പോർട്ട്. സദാനന്ദന് ഹൃദ്രോഗവും രക്തസമ്മർദ്ദവും പ്രമേഹവും ഉണ്ടായിരുന്നു. വൃന്ദ അർബുദബാധിതയായിരുന്നു.

എസ് എ ടി ആശുപത്രിയിൽ ഇന്നലെ രാത്രിയായിരുന്നു വിജയയുടെ മരണം . ചെന്നൈ സ്വദേശിയായ വിജയ വിഴിഞ്ഞത്താണ് താമസിച്ചിരുന്നത്. കഴിഞ്ഞ ദിവസം ഇവർ പെൺകുഞ്ഞിന് ജന്മം നൽകിയിരുന്നെങ്കിലും കുഞ്ഞ് പ്രസവ സമയത്ത് തന്നെ മരിച്ചിരുന്നു. മെഡിക്കൽ കോളജിൽ ഇന്ന് രാവിലെയായിരുന്നു പ്രതാപന്റെ മരണം. ഹൃദയ, ശ്വാസകോശ രോഗങ്ങൾ ഉണ്ടായിരുന്നു. ഇദ്ദേഹത്തിന്റെ കുടുംബത്തിലെ 9 അംഗങ്ങൾക്കും കൊവിഡ് സ്ഥിരീകരിച്ചിരുന്നു.