ബീജിംഗ്: പരസ്പര വിശ്വാസം വർദ്ധിപ്പിക്കുന്നതിനും അഭിപ്രായ വ്യത്യാസങ്ങൾ പരിഹരിക്കുന്നതിനും ഇന്ത്യയുമായി ചേർന്ന് പ്രവർത്തിക്കാൻ ചൈന തയ്യാറാണെന്ന് ചൈനീസ് വിദേശകാര്യ മന്ത്രാലയം. പ്രധാനമന്ത്രി നരേന്ദ്ര മോദിയുടെ സ്വാതന്ത്ര്യദിന പ്രസംഗത്തോട് പ്രതികരിക്കുകയായിരുന്നു ചൈനീസ് വിദേശകാര്യ മന്ത്രാലയം. പരസ്പരം ബഹുമാനിക്കുക എന്നതാണ് ഇരു രാജ്യങ്ങളുടെയും മുന്നിലുള്ള ശരിയായ വഴിയെന്നും അവർ കൂട്ടിച്ചേർത്തു.

'പ്രധാനമന്ത്രി നരേന്ദ്ര മോദിയുടെ പ്രസംഗം ഞങ്ങൾ ശ്രദ്ധിച്ചു. ഞങ്ങൾ അടുത്ത അയൽക്കാരാണ്. നാമെല്ലാം നൂറ് കോടിയിലധികം ജനസംഖ്യയുള്ള വളർന്നുവരുന്ന രാജ്യങ്ങളാണ് '- മോദിയുടെ പ്രസംഗത്തെക്കുറിച്ച് പ്രതികരിച്ചുകൊണ്ട് ചൈനീസ് വിദേശകാര്യ വക്താവ് ഷാവോ ലിജിയാൻ പറഞ്ഞു.

ഉഭയകക്ഷി ബന്ധത്തിന്റെ വികസനം രണ്ട് ജനതയുടെ താത്പര്യം മാത്രമല്ല, മേഖലയുടെ സ്ഥിരതയ്ക്കും സമാധാനത്തിനും ലോകത്തിന്റെ അഭിവൃദ്ധിക്കും സഹായിക്കുമെന്നും ലിജിയാൻ പറഞ്ഞു. നമ്മുടെ ദീർഘകാല താത്പര്യങ്ങൾ നടപ്പിലാക്കാൻ പരസ്പരം ബഹുമാനിക്കുകയും പിന്തുണയ്ക്കുകയും ചെയ്യുക എന്നതാണ് ഇരുപക്ഷത്തിനും ശരിയായ വഴിയെന്നും അദ്ദേഹം കൂട്ടിച്ചേർത്തു.