വെള്ളരിക്കുണ്ട്: മകന്റെ ക്രൂരതയ്ക്ക് ഇരയാകേണ്ടിവന്ന കുടുംബത്തിന് സഹായവുമായി പിഗ് ഫാർമേർസ് അസോസിയേഷൻ (പി എഫ് എ). പിഗ് ഫാർമേർസ് അസോസിയേഷൻ സംസ്ഥാന കമ്മിറ്റി സ്വരൂപിച്ച ധനസഹായം സംസ്ഥാന പ്രസിഡന്റ് ടി.എം. ജോഷി ബെന്നിയുടെ ഭാര്യ ബെസ്സി ബെന്നിക്ക് കൈമാറി.

സഹോദരൻ ഐസ്ക്രീമിൽ വിഷം ചേർത്ത് നൽകി മരണപ്പെട്ട ആൻ മേരിയുടെ പിതാവിന്റെ ചികിത്സയ്ക്കു വേണ്ടിയും അവരുടെ കുടുംബത്തെ സഹായിക്കുന്നതിനും വേണ്ടിയാണ് രണ്ടു ലക്ഷത്തി പതിമൂവായിരം (2,13,000/-)രൂപ സംസ്ഥാനത്തെ പന്നികർഷകരായ പി എഫ് എ അംഗങ്ങളിൽ നിന്നും സ്വരൂപിച്ചത്. ബളാൽ അരിങ്കലിലെ പന്നി കർഷകനാണ് പെൺകുട്ടിയുടെ പിതാവ് ഓലിക്കൽ ബെന്നി മാത്യു.

ബെന്നിയും കുടുംബവും ആശുപത്രിയിൽ ആയതോടെയാണ് കർഷകന്റെ ചികിൽസാ ചെലവിനും ഉപജീവന മാർഗമായ മിണ്ടാപ്രാണികളായ പന്നികൾക്കുള്ള തീറ്റയും പരിചരണവും അസോസിയേഷൻ ഏറ്റെടുത്തത്. പയ്യന്നൂരിലെ സ്വകാര്യ ആശുപത്രിയിൽ ബെന്നി ഇപ്പോഴും ചികിൽസയിലാണ്.

പി എഫ് എ കാസർകോട് ജില്ലാ പ്രസിഡന്റ് തങ്കരാജ് മാണിക്കോത്ത്, സെക്രട്ടറി കെ.ജെ. ബിനോയ്, സംസ്ഥാന എക്സിക്യുട്ടീവ് അംഗങ്ങളായ മിനി ബെന്നി , സി.കെ.സജിത, കണ്ണൂർ ജില്ലാ പ്രസിഡന്റ് ജോസ് മാത്യു, സനിൽസേവ്യർ, സിബിവാണിശേരി, വി.കെ.ഗിരിഷ്, മാത്യുക്കുട്ടി പാറേൽ, കുഞ്ഞികൃഷ്ണൻ കരിന്തളം, ജോൺസൻ അടുക്കം, ഭഗീരഥൻ ചീമേനി ,ജോർജ് ബങ്കളം എന്നിവർ പരിപാടിയിൽ സംബന്ധിച്ചു.