ന്യൂയോർക്ക്: ലോകത്ത് കൊവിഡ് ബാധിതരുടെ എണ്ണം 22,294,515 ആയി ഉയർന്നു. മരണസംഖ്യയും കുതിച്ചുയരുകയാണ്.ഇതുവരെ 783,430 പേരാണ് രോഗം ബാധിച്ച് മരിച്ചത്.15,037,176 പേർ സുഖം പ്രാപിച്ചു. അമേരിക്കയിൽ 24 മണിക്കൂറിനിടെ നാൽപതിനായിരത്തിൽ കൂടുതലാളുകൾക്കാണ് പുതുതായി രോഗം സ്ഥിരീകരിച്ചത്.

യു.എസിൽ ഇതുവരെ 5,655,328 പേർക്കാണ് കൊവിഡ് സ്ഥിരീകരിച്ചത്. ഇന്നലെ മാത്രം 1221 പേർ മരിച്ചു. ഇതോടെ ആകെ മരണസംഖ്യ 175,040 ആയി ഉയർന്നു. 3,010,892 പേർ സുഖം പ്രാപിച്ചു. ബ്രസീലിൽ രോഗവ്യാപനം രൂക്ഷമാവുകയാണ്. കഴിഞ്ഞ 24 മണിക്കൂറിനിടെ അരലക്ഷത്തോളം പേർക്കാണ് രാജ്യത്ത് പുതുതായി കൊവിഡ് സ്ഥിരീകരിച്ചത്. ഇതോടെ ആകെ രോഗബാധിതരുടെ എണ്ണം 3,411,872ആയി. 110,019പേർ മരണപ്പെട്ടു. 2,554,179 പേർ രോഗമുക്തി നേടി.

ലോകത്തെ ആദ്യ കൊവിഡ് മുക്ത രാഷ്ട്രമായി പ്രഖ്യാപിച്ച ന്യൂസിലൻഡിൽ വീണ്ടും വൈറസ് ബാധ പിടിമുറുക്കുകയാണ്. ഒരു വീട്ടിലെ നാല് പേരിൽ തുടങ്ങിയ രോഗം ഇപ്പോൾ സമ്പർക്കത്തിലൂടെ ബാധിച്ചിരിക്കുന്നത് ആകെ 58 പേർക്കാണ്. ഓക്ക്‌ലൻഡ് ലോക്ക്ഡൗണിലാണ്. രാജ്യത്തിന്റെ മറ്റു ഭാഗങ്ങളിലും നിയന്ത്രണങ്ങൾ ഏർപ്പെടുത്തിയിരിക്കുകയാണ്.

ഇന്ത്യയിലും സ്ഥിതി ഗുരുതരമായി തുടരുകയാണ്. ഇതുവരെ പുറത്തുവന്ന കണക്കുകൾ പ്രകാരം കൊവിഡ് ബാധിതരുടെ എണ്ണം 27 ലക്ഷം കടന്നു. മരണം 51000പിന്നിട്ടു. ആകെ രോഗം ഭേദമായവരുടെ എണ്ണം ഇരുപത് ലക്ഷത്തിനടുത്തെത്തി. മരണനിരക്ക് 1.92 ശതമാനമായി കുറഞ്ഞു.