പോർട്ട് ലൂയിസ്: മൗറീഷ്യസ് തീരത്ത് പവിഴപ്പുറ്റിലിടിച്ച് ജപ്പാനീസ്​ എണ്ണക്കപ്പൽ തകർന്ന്​ വൻതോതിൽ എണ്ണ ചോർന്ന സംഭവത്തിൽ കപ്പലിലെ ക്യാപ്റ്റനേയും ഡെപ്യൂട്ടിയേയും മൗറീഷ്യസ് പൊലീസ് അറസ്റ്റ് ചെയ്തു. ഇന്ത്യൻ പൗരനായ ക്യാപ്റ്റൻ സുനിൽ കുമാർ നന്ദേശ്വറും ഡെപ്യൂട്ടി ക്യാപ്​റ്റനായ ശ്രീലങ്കൻ പൗരനുമാണ് അറസ്റ്റിലായത്.

ഇരുവരേയും 25ന് കോടതിയിൽ ഹാജരാക്കും. കപ്പലിലെ മറ്റു ജീവനക്കാരെ ചോദ്യംചെയ്തു കൊണ്ടിരിക്കുകയാണെന്നും അപകടത്തിൽ വിശദമായ അന്വേഷണം തുടരുമെന്നും മൗറീഷ്യസ് പൊലീസ്​ വക്താവ്​ അറിയിച്ചു.

സംഭവം ഇങ്ങനെ

ജപ്പാന്റെ ഉടമസ്ഥതയിലുള്ള എം.വി വകാഷിയോ എന്ന കപ്പൽ സിങ്കപ്പൂരിൽ നിന്ന് ബ്രസീലിലേക്കുള്ള യാത്രക്കിടെ ജൂലായ് 25നാണ് മൗറീഷ്യൻ തീരത്ത് പവിഴപ്പുറ്റിലിടിച്ചത്. നാലായിരം ടൺ ഇന്ധനമാണ് കപ്പലിലുണ്ടായിരുന്നത്. ഇതിൽ​ 1000 ടൺ എണ്ണയാണ്​ കടലിലേക്ക് ഒഴുകി​. കപ്പലിൽ നിന്ന് മൂവായിരത്തോളം ടൺ എണ്ണ പമ്പ് ചെയ്ത് മാറ്റിയിരുന്നു. തിരമാലയുടെ ശക്തിയിൽ ദിവസങ്ങൾക്ക് മുമ്പ് കപ്പൽ രണ്ടായി പിളരുകയും ചെയ്തു.

സിങ്കപ്പൂരിൽ നിന്ന് ബ്രസീലിലേക്ക് പോകുകയായിരുന്ന കപ്പൽ എന്തിനാണ് ദ്വീപിനോട് ഇത്ര അടുത്ത് വന്നതെന്ന് അധികൃതർ ഇതുവരെ വെളിപ്പെടുത്തിയിട്ടില്ല. ദ്വീപിനോട്​ ചേർന്ന്​ പവിഴപ്പുറ്റുകൾ നിറഞ്ഞ ഭാഗത്ത്​ എണ്ണ ചോർന്നത്​ വൻ പാരിസ്ഥിതിക ദുരന്തമാണ്​ ഉണ്ടാക്കിയതെന്ന്​ മൗറീഷ്യസ്​ സർക്കാർ പറയുന്നത്​. കപ്പലിന്റെ എഞ്ചിൻ റൂം ഉൾപ്പെടുന്ന ഭാഗം പവിഴപ്പുറ്റിനെ ഇടിച്ച് നിൽക്കുന്ന രീതിയിലാണുള്ളത് .പവിഴപ്പുറ്റുകൾ നിറഞ്ഞ മൗറീഷ്യസ്​ തീരം സഞ്ചാരികളുടെ പ്രിയപ്പെട്ട ഇടമാണ്​.