തിരുവനന്തപുരം: പച്ചക്കറിവാനിൽ കഞ്ചാവ് കടത്തുന്നതിനിടെ യുവാവ് പിടിയിലായി. കായംകുളം സ്വദേശി അഷറഫാണ് ഇന്നലെ വൈകുന്നേരം പൂന്തുറയ്ക്കുസമീപം പുതുക്കാട്ട് വച്ച് പിടിയിലായത്. തമിഴ്നാട്ടിൽ നിന്നാണ് കഞ്ചാവ് എത്തിച്ചതെന്ന് പൊലീസ് പറയുന്നു. എട്ടുകിലോ കഞ്ചാവാണ് ഇയാളിൽ നിന്ന് പിടിച്ചെടുത്തത്.

പച്ചക്കറിക്കൊപ്പം തമിഴ്നാട്ടിൽ നിന്ന് പതിവായി കഞ്ചാവ് എത്തിച്ച് തിരുവനന്തപുരം, ആലപ്പുഴ, കൊല്ലം ജില്ലകളിലെ കച്ചവടക്കാർക്ക് വിതരണം ചെയ്യുകയായിരുന്നു ഇയാളുടെ രീതി എന്നാണ് പൊലീസ് പറയുന്നത്. ഇയാൾക്കൊപ്പം കഞ്ചാവ് വിൽപ്പനയിൽ പങ്കാളികളായവരെ കണ്ടെത്താനുളള ശ്രമത്തിലാണ് പൊലീസ്.