ഡബ്ലിൻ: വർഷങ്ങളായി കെ.എഫ്.സിയുടെ മുഖമുദ്ര‌യാണ് ഭക്ഷണം കഴിച്ച് കൊതി
തീരാതെ വിരൽനക്കുന്നവരെ കാട്ടിയുള്ള 'ഫിംഗർ ലിക്കിംഗ് ഗുഡ്' എന്ന പരസ്യ വാചകം.
ഇപ്പോഴിതാ, 64 വർഷങ്ങൾക്ക് ശേഷം ഈ പരസ്യവാചകം ഉപേക്ഷിച്ചിരിക്കുകയാണ് കെ.എഫ്.സി.
കൊവിഡ് വ്യാപനത്തിന്റെ സാഹചര്യത്തിൽ തികച്ചും അനുയോജ്യമല്ലാത്ത പരസ്യവാചകമായതിനാലാണ് ഈ നടപടിയെന്ന് കമ്പനിയുടെ ചീഫ് മാർക്കറ്റിംഗ് ഓഫീസറായ കാതറിൻ റ്റാൻ ഗില്ലെപ്‌സി അറിയിച്ചു.
വൈറസിനെ ചെറുക്കാൻ കൈകൾ നല്ലപോലെ ശുചിയാക്കാതെ കണ്ണ്, മൂക്ക്, വായ എന്നീ ശരീരഭാഗങ്ങളിൽ സ്പർശിക്കരുതെന്ന് രോഗ നിയന്ത്രണ, പ്രതിരോധ സ്ഥാപനങ്ങൾ ജനങ്ങളോട് നിരന്തരം ആവശ്യപ്പെടുന്നു. അത്തരമൊരു സാഹചര്യത്തിൽ ഇങ്ങനെയൊരു പരസ്യവാചകം ഉപയോഗിക്കുന്നത് ശരിയല്ലെന്നാണ് കരുതുന്നതെന്നും അവർ കൂട്ടിച്ചേർത്തു. ഉചിതമായ സമയത്ത് പരസ്യവാചകം തിരികെ കൊണ്ടുവരുന്നതാണെന്നും കമ്പനി വ്യക്തമാക്കി. പരസ്യ വാചകഭാഗം അവ്യക്തമാക്കി കെ.എഫ്.സിയുടെ പരസ്യവീഡിയോയും യൂട്യൂബിൽ കമ്പനി പുറത്തിറക്കിയിട്ടുണ്ട്.