കൊച്ചി: വര്‍ക്ക് ഫ്രം ഹോം കാലഘട്ടം ആയതോടെ ലാപ്‌ടോപ്പുകളാണ് ഇപ്പോള്‍ പലരുടെയും ഓഫീസ്. ഉപയോഗിക്കാന്‍ എളുപ്പം എന്നുള്ളത് കൊണ്ട് തന്നെ കമ്പനികളും തങ്ങളുടെ തൊഴിലാളികള്‍ക്ക് ലാപ്‌ടോപ്പുകളാണ് ഇപ്പോള്‍ ജോലി ചെയ്യാനായി നല്‍കുന്നത്. അതേസമയം, പുത്തന്‍ ലാപ്ടോപ്പ് മണിക്കൂറുകളോളം പ്ലഗ് ചെയ്യാതെ പ്രവര്‍ത്തിക്കുന്നതും മാസങ്ങള്‍ കഴിയുന്നതോടെ ബാറ്ററിയുടെ ലൈഫ് കുറയുന്നതും സര്‍വസാധാരണമാണ്.
ചില കാര്യങ്ങള്‍ ശ്രദ്ധിച്ചാല്‍ ബാറ്ററി ലൈഫ് പെട്ടന്ന് കുറയുന്നത് ഒഴിവാക്കാവുന്നതാണ്.
ബ്രൈറ്റ്‌നെസ്സ് കുറയ്ക്കാം - പലപ്പോഴും ലാപ്ടോപ്പിന്റെ ഡിസ്പ്ലേയുടെ തെളിച്ചം പരമാവധി കൂട്ടിയിട്ടാണ് നാം ഉപയോഗിക്കാറുള്ളത്. ഡിസ്പ്ലേയുടെ തെളിച്ചം കുറച്ച് ഉപയോഗിക്കുന്നത് ബാറ്ററിയുടെ ലൈഫ് വര്‍ദ്ധിപ്പിക്കും. സാധാരണ ഗതിയില്‍ കീബോര്‍ഡില്‍ തന്നെ ഇതിനായി ഫംഗ്ഷന്‍ കീകളുണ്ടാകും. നിങ്ങളുടെ ലാപ്ടോപ്പിന് ഈ ബട്ടണുകള്‍ ഇല്ലെങ്കില്‍, നിങ്ങള്‍ക്ക് സെറ്റിംഗ്‌സ്> സിസ്റ്റം> ഡിസ്‌പ്ലേയില്‍ പോയി തെളിച്ചം ക്രമീകരിക്കാം.
മൈക്രോസോഫ്റ്റ് എഡ്ജ് ബ്രൗസര്‍ ഉപയോഗിച്ചാല്‍ നല്ലത് - നമ്മളില്‍ ഭൂരിപക്ഷം പേരും ഗൂഗിള്‍ ക്രോം ആണ് ബ്രൗസിങ്ങിനായി ഉപയോഗിക്കുന്നത്. അതെ സമയം ക്രോം, ഫയര്‍ഫോക്‌സ്, ഓപ്പറ പോലുള്ള ബ്രൗസറുമായി താരതമ്യപ്പെടുത്തുമ്പോള്‍ എഡ്ജ് ബാറ്ററി ലാഭിക്കുന്നുവെന്ന് മൈക്രോസോഫ്റ്റ് അവകാശപ്പെടുന്നു. ലാപ്ടോപ്പിന്റെ ബാറ്ററി 20 ശതമാനത്തില്‍ താഴെയാകുമ്പോള്‍ ചാര്‍ജ് ചെയ്യുക. പൂര്‍ണമായും ചാര്‍ജ് ചെയ്ത് കഴിഞ്ഞാല്‍ ചാര്‍ജിംഗ് കേബിള്‍ മാറ്റാനും മറക്കരുത്.
കീബോര്‍ഡ് ബാക്ക് ലൈറ്റുകള്‍ ഓഫാക്കുക - ഗെയിമിംഗ് ലാപ്‌ടോപ്പുകളുടെ കീബോര്‍ഡുകളില്‍ ചുവപ്പു നിറത്തിലുള്ള ബാക്ക് ലൈറ്റുകള്‍ കണ്ടിട്ടില്ലേ? ഇത്തരത്തില്‍ ബാക്ക് ലൈറ്റുകള്‍ ഉള്ള കൂട്ടത്തിലാണ് നിങ്ങളുടെ ലാപ്ടോപ്പ് എങ്കില്‍ ഇത് ബാറ്ററി കാര്‍ന്നു തിന്നും. കീബോര്‍ഡിലെ ഒരു ഫംഗ്ഷന്‍ ബട്ടണ്‍ അമര്‍ത്തിക്കൊണ്ട് നിങ്ങള്‍ക്ക് ഓഫ് ചെയ്യാം
ബാറ്ററി സേവര്‍ - ആന്‍ഡ്രോയിഡ്, ഐ.ഒ.എസ് ഫോണുകള്‍ക്ക് സമാനമായി, ബാറ്ററി ലൈഫ് 20 ശതമാനത്തില്‍ താഴെയെത്തിയാല്‍ ലാപ്ടോപ്പുകളും ബാറ്ററി സേവര്‍ മോഡ് ഉപയോഗിക്കും. സെറ്റിംഗ്‌സ്> സിസ്റ്റം> ബാറ്ററിയിലേക്ക് പോയി ബാറ്ററി സേവര്‍ ഓണാണോയെന്ന് പരിശോധിക്കുക.
അണ്‍പ്ലഗ് ചെയ്യുക - വെബ്ക്യാം, എക്സ്റ്റേര്‍ണല്‍ ഹാര്‍ഡ് ഡ്രൈവുകള്‍ പോലുള്ള ഉപകരണങ്ങള്‍ ഉപയോഗം കഴിഞ്ഞാല്‍ ഉടനെ അണ്‍പ്ലഗ് ചെയ്യുക. ലാപ്ടോപ്പ് സ്ലീപ്പ് മോഡിലായിരിക്കുമ്പോള്‍ പോലും യു.എസ്.ബി പ്രവര്‍ത്തിക്കാന്‍ ആവശ്യമായ ഊര്‍ജം നിങ്ങളുടെ ലാപ്‌ടോപ്പില്‍ നിന്നാണ് എടുക്കുന്നത് എന്ന് ഓര്‍മ്മിക്കുകണം.
ബ്ലൂടൂത്ത്, വൈഫൈ ഓഫാക്കുക - ഉപയോഗത്തിലില്ലാത്തപ്പോള്‍ ലാപ്ടോപ്പിന്റെ ബ്ലൂടൂത്തും വൈ-ഫൈയും ഓഫ് ആക്കാന്‍ മറക്കരുത്.