ചെന്നെെ: കൊവിഡ് ബാധിച്ച് ചെന്നൈ അപ്പോളോ ആശുപത്രിയിൽ ചികിത്സയിലായിരുന്ന കന്യാകുമാരി കോൺഗ്രസ് എം.പി വസന്തകുമാർ അന്തരിച്ചു. കൊവിഡ് രോഗം രൂക്ഷമായതിനെ തുടർന്ന് ഒരാഴ്ച്ചയിൽ ഏറെയായി വെൻറ്റിലേറ്ററിലായിരുന്നു അദ്ദേഹം.തമിഴ്‌നാട് കോൺഗ്രസ് മുൻ പ്രസിഡന്റും മുതിർന്ന കോൺഗ്രസ് നേതാവുമായ കുമരി അനന്തന്റെ സഹോദരനാണ് വസന്തകുമാർ. ഓഗസ്റ്റ് 11 നാണ് വസന്തകുമാറിന് കൊവിഡ് സ്ഥിരീകരിച്ചത്.

നിലവിൽ തമിഴ്നാട് കോൺഗ്രസ് ഘടകം വർക്കിംഗ് പ്രസിഡന്റാണ് വസന്തകുമാർ. കഴിഞ്ഞ ലോക്സഭാ തിരഞ്ഞെടുപ്പിൽ വൻ ഭൂരിപക്ഷത്തോടെയാണ് വസന്തകുമാർ പൊൻ രാധാകൃഷ്ണനെ പരാജയപ്പെടുത്തി കന്യകുമാരി എം.പിയായത്. തമിഴ്നാട്ടിലും കർണാടകത്തിലും നിരവധി ബ്രാഞ്ചുകളുള്ള 'വസന്ത് ആൻഡ് കോ ' യുടെ സ്ഥാപകനും വസന്ത് ടിവി എം.ഡിയുമാണ് വസന്തകുമാർ. രണ്ട് തവണ നംഗുന്നേരിയിൽ നിന്ന് തമിഴ്നാട് നിയമസഭയിലേക്ക് തിരഞ്ഞെടുക്കപ്പെട്ടിട്ടുണ്ട്.