കാൻബറ: തന്റെ വീട്ടിലെ ബാത്ത്റൂമിലെ ടോയ്‌ലറ്റിന്റെ ഫ്ലഷ് സംവിധാനത്തിന് എന്തോ തകരാറ് സംഭവിച്ചെന്ന് മനസിലായതോടെ 25 കാരിയായ സോഫി അതൊന്നു പരിശോധിച്ച് കണ്ടെത്തിയിട്ടു തന്നെ കാര്യമെന്ന് തീരുമാനിച്ചു. പക്ഷേ, സിസ്റ്റേൺ തുറന്ന് പരിശോധിച്ചതോടെ സോഫി ആകെ ഞെട്ടിത്തരിച്ചു പോയി. ഒന്നല്ല, രണ്ടല്ല... നാല് പാമ്പുകൾ ദേ വെള്ളത്തിൽ ചുരുണ്ടു കിടക്കുന്നു. ! ഇവർ എവിടെ നിന്നും എത്തിയെന്നോ എങ്ങനെ ഇതിനകത്ത് കടന്നു കൂടിയെന്നോ അറിയാതെ സോഫി പേടിച്ച് വിറച്ചു പോയി. ഓസ്ട്രേലിയയിലെ ക്വീൻസ്‌ലാൻഡിലാണ് സംഭവം.

കഴിഞ്ഞ ദിവസമാണ് ടോയ്‌ലറ്റിന്റെ ഫ്ലഷ് ബട്ടൺ അമർത്താൻ ബുദ്ധിമുട്ട് അനുഭവപ്പെട്ടതിനെ തുടർന്ന് സോഫി ടോയ്‌ലറ്റ് സിസ്റ്റേൺ തുറന്ന് പരിശോധിച്ചത്. ആദ്യം നന്നായി ഭയന്നെങ്കിലും നാല് പേരും അത്ര ഭീകരർ അല്ല എന്ന് തിരിച്ചറിഞ്ഞതോടെയാണ് സോഫിയ്ക്ക് സമാധാനമായത്. കോമൺ ട്രീ സ്നേക്ക് ഇനത്തിൽപ്പെട്ട പാമ്പുകളായിരുന്നു ടോയ്‌‌ലറ്റ് സിസ്റ്റേണിനുള്ളിൽ കണ്ടെത്തിയവ. നാലെണ്ണത്തിൽ ഏറ്റവും നീളം കൂടിയതിന് 3.2 അടി നീളമുണ്ടായിരുന്നു. ഏതായാലും ഭാഗ്യത്തിന് ഇക്കൂട്ടർ വിഷമില്ലാത്തവയാണ്.

തവള, അരണ തുടങ്ങിയവയാണ് ഇവരുടെ പ്രധാന ആഹാരം. മരപ്പൊത്തുകൾ, കെട്ടിടങ്ങളുടെയും മറ്റും വിടവുകൾ അങ്ങനെ സേഫ് ആയിട്ട് തോന്നുന്ന എല്ലായിടത്തും കയറിയിരിക്കുക എന്നത് നുഴഞ്ഞുകയറാൻ വിദഗ്ദ്ധരായ ഇക്കൂട്ടരുടെ പ്രധാന ഹോബിയാണ്. അപകടകാരികളല്ലാതിരുന്നതിനാൽ നാല് പേരെയും സോഫി അയൽക്കാരുടെ സഹായത്തോടെ വീടിനു സമീപത്തെ കരിമ്പ് പാടത്തേക്ക് വിട്ടയച്ചു. ഇതിനു മുമ്പും ക്വീൻസ്‌ലാൻഡിലെ പല വീടുകളിലും ഇത്തരത്തിൽ ട്രീ സ്നേക്കുകളെ കണ്ടെത്തിയിട്ടുണ്ട്.