2014ല്‍ റിലീസ് ചെയ്യപ്പെട്ട പൃഥ്വിരാജ് ചിത്രമായ 'സെവന്‍ത് ഡേ' സിനിമയില്‍ ഹിറ്റായ ഒരു ഡയലോഗ് ഉണ്ട്. സംഭാഷണം ഇങ്ങനെ ആരംഭിക്കുന്നു.. 'കര്‍ണന്‍, നെപ്പോളിയന്‍,ഭഗത് സിംഗ്' ഇവര്‍ മൂന്നുപേരുമാണ് എന്റെ ഹീറോസ്. യു സീ ദി ഐറണി, ഡോണ്ട് യൂ?' ഇപ്പോഴിതാ ഇതിൽ നിന്ന് പ്രചോദനം ഉള്‍ക്കൊണ്ട് ഒരു സിനിമ ടൈറ്റില്‍.
ശരത്.ജി മോഹന്‍ സംവിധാനം ചെയ്ത 'കര്‍ണന്‍ നെപ്പോളിയന്‍ ഭഗത് സിംഗ്' എന്ന ചിത്രത്തിലെ ആദ്യ ലിറിക്കല്‍ വീഡിയോ പുറത്തിറങ്ങി. ഒരു ഇടവേളയ്ക്ക് ശേഷം ഉണ്ണി മേനോന്‍ മലയാള സിനിമയില്‍ പാടുന്ന എന്ന പ്രത്യേകതയുമായാണ് ഗാനം എത്തുന്നത്. കാതോര്‍ത്തു കാതോര്‍ത്തു എന്ന് തുടങ്ങുന്ന പാട്ടിന് വരികളെഴുതിയിരിക്കുന്നത് ബി.കെ ഹരിനാരായണനാണ്. രഞ്ജിന്‍ രാജിന്റേതാണ് സംഗീതം.
ആകെ അഞ്ചു പാട്ടുകളാണ് ചിത്രത്തിലുള്ളത്. ഫസ്റ്റ് പേജ് എന്റർടെയിൻമെന്റിന്റെ ബാനറില്‍ മോനു പഴേടത്താണ് ചിത്രം നിര്‍മിച്ചിരിക്കുന്നത്. ധീരജ് ഡെന്നിയും ആദ്യാ പ്രസാദും മുഖ്യവേഷത്തിലെത്തുന്ന ഈ ചിത്രത്തില്‍ ഇന്ദ്രന്‍സ്, ജോയ് മാത്യു, നന്ദു, വിജയ കുമാര്‍, റോണി ഡേവിഡ് തുടങ്ങിയവരും പ്രധാന വേഷത്തില്‍ എത്തുന്നുണ്ട്.