തിരുവനന്തപുരം : കേരള കോൺഗ്രസ് ചിഹ്ന തർക്കത്തിൽ ജോസ് കെ.മാണി വിഭാഗത്തിന് വിജയം. പാർട്ടിയുടെ രണ്ടിലചിഹ്നത്തിനുള്ള അവകാശം ജോസ് കെ. മാണി വിഭാഗത്തിനാണെന്ന് കേന്ദ്ര തിരഞ്ഞെടുപ്പ് കമ്മിഷൻ വിധിയെഴുതി. ജോസഫ് - ജോസ് വിഭാഗങ്ങൾ നൽകിയ പരാതിയിൻമേലാണ് കേന്ദ്രതെരഞ്ഞെടുപ്പ് കമ്മീഷൻ തീരുമാനമെടുത്തത്. എന്നാൽ കമ്മീഷനിൽത്തന്നെ ചിഹ്നം നൽകുന്നത് സംബന്ധിച്ച് ഭിന്നാഭിപ്രായം ഉടലെടുത്തു. തീരുമാനത്തിനെതിരെ ഉടനടി അപ്പീൽ പോകുമെന്ന് പി ജെ ജോസഫ് അറിയിച്ചു. അതേസമയം സത്യത്തിന്റെ വിജയമെന്ന് ജോസ്. കെ. മാണി വിഭാഗം പറഞ്ഞു..

ജോസ് കെ.. മാണിയുടെ നേതൃത്വത്തിൽ ഉള്ള വിഭാഗത്തെയാണ് കേരള കോൺഗ്രസ് (എം) എന്ന് വിളിക്കാനാകുക എന്നാണ് ഭൂരിപക്ഷ വിധി വന്നത്. കമ്മീഷനിൽ പരാതി പരിഗണിച്ച മൂന്നംഗ സമിതിയിൽ മുഖ്യ തിരഞ്ഞെടുപ്പ് കമ്മീഷണർ സുനിൽ അറോറ, സുശീൽ ചന്ദ്ര എന്നിവർ രണ്ടില ജോസ് കെ മാണിക്ക് നൽകുന്നതിനെ അനുകൂലിച്ചു. എന്നാൽ അശോക് ലവാസ ഇതിനോട് വിയോജിച്ചു. രണ്ട് പേർക്കും ചിഹ്നം നൽകാൻ കഴിയില്ല എന്നായിരുന്നു അശോക് ലവാസയുടെ നിലപാട്. രണ്ട് വിഭാഗത്തെയും കേരള കോൺഗ്രസ് (എം) ആയി കണക്കാക്കാൻ കഴിയില്ല എന്നും ന്യൂനപക്ഷ വിധിയിൽ അശോക് ലവാസ ചൂണ്ടിക്കാട്ടി.