മലപ്പുറം: സംസ്ഥാന സർക്കാരിന്റെ ആർദ്രം മിഷന്റെ ഭാഗമായി ജില്ലയിൽ എട്ട് കുടുബാരോഗ്യ കേന്ദ്രങ്ങൾ കൂടി പ്രവർത്തന സജ്ജമായി. കുടുംബാരോഗ്യ കേന്ദ്രങ്ങളുടെ ഉദ്ഘാടനം ഇന്ന് രാവിലെ 10.30ന് മുഖ്യമന്ത്രി പിണറായി വിജയൻ വീഡിയോ കോൺഫറൻസിംഗിലൂടെ നിർവഹിക്കും. ആരോഗ്യ​ സാമൂഹ്യനീതി വകുപ്പ് മന്ത്രി കെ.കെ.ശൈലജ അദ്ധ്യക്ഷയാവും. ഏലംകുളം, മാറാക്കര, പാലപ്പെട്ടി, വളവന്നൂർ, ഓടക്കയം, തൃപങ്ങോട്, മൂർക്കനാട്, തേവർ കടപ്പുറം തുടങ്ങിയ എട്ട് കുടുംബാരോഗ്യ കേന്ദ്രങ്ങളാണ് ജില്ലയിൽ ഉദ്ഘാടനത്തിന് സജ്ജമായിരിക്കുന്നത്. പരിപാടിയിൽ എം.എൽ.എമാർ, മറ്റ് ജനപ്രതിനിധികൾ, ഉദ്യോഗസ്ഥർ തുടങ്ങിയവർ ഓൺലൈൻ മുഖേന പങ്കെടുക്കും.