പട്ടാമ്പി: താലൂക്ക് പരിധിയിൽ അനധികൃതമായി കുന്നിടിച്ച് മണ്ണും പുഴമണലും കടത്തിയ എട്ട് ടിപ്പർ ലോറികളും മണ്ണുമാന്തി യന്ത്രവും ഒറ്റപ്പാലം സബ് കളക്ടർ അർജുൻ പാണ്ഡ്യന്റെ നേതൃത്വത്തിലുള്ള സ്പെഷ്യൽ സ്‌ക്വാഡ് പിടികൂടി. കഴിഞ്ഞ ദിവസം പുലർച്ചെ രണ്ടിനാണ് വാവനൂരിൽ നിന്ന് അനധികൃത മണ്ണുകടത്തിയ വാഹനങ്ങൾ കസ്റ്റഡിയിലെടുത്തത്.

തിരുമിറ്റക്കോട് പമ്പ് ഹൗസിന് സമീപം പുഴയിൽ നിന്ന് മണൽ കയറ്റി വരുമ്പോഴാണ് ടിപ്പർ ലോറി പിടിയിലായത്. നിയമാനുസൃത രേഖകളില്ലാതെ കുന്നിടിച്ച് മണ്ണുഖനനം ചെയ്യുന്നതിനും കടത്തിയതിനും സ്ഥലമുടമയിൽ നിന്നും വാഹന ഉടമകളിൽ നിന്നും പിഴ ഈടാക്കുന്നതിന് ജിയോളജി വകുപ്പിന് സബ് കലക്ടർ നിർദേശം നൽകി. മണൽ ലോറി സർക്കാരിലേക്ക് കണ്ടുകെട്ടും. ഡ്രൈവർക്കെതിരെ ക്രിമിനൽ കേസെടുക്കും.

ഡെപ്യുട്ടി തഹസിൽദാർ എൻ.ശിവരാമൻ, വില്ലേജ് ഓഫീസർമാരായ കെ.സി.കൃഷ്ണകുമാർ, പി.ആർ.മോഹനൻ, കെ.ഷാജി എന്നിവർ പരിശോധനയ്ക്ക് നേതൃത്വം നൽകി.

ഓണത്തോടനുബന്ധിച്ചുള്ള അവധി ദിവസങ്ങളിൽ പ്രകൃതിചൂഷണം തടയുന്നതിനായി താലൂക്കുതല പ്രത്യേക സ്‌ക്വാഡുകൾ പരിശോധന നടത്തും. ഡെപ്യൂട്ടി തഹസിൽദാർമാരുടെയും വില്ലേജ് ഓഫീസർമാരുടേയും നേതൃത്വത്തിലാണ് പരിശോധന.