പത്തനംതിട്ട: കൊവിഡ് രോഗവ്യാപനത്തോടെ പ്രതിസന്ധിയിലായ ടൂറിസം മേഖലയെ പുനരുജ്ജീവിപ്പിക്കുന്നതിന്റെ ഭാഗമായി കൊവിഡ് അനന്തര ടൂറിസം എന്ന രീതിയിൽ ഗ്രാമീണ ടൂറിസം പദ്ധതിയുമായി ജില്ലാ ടൂറിസം പ്രമോഷൻ കൗൺസിൽ. ഒരു തദ്ദേശ സ്വയംഭരണ പ്രദേശത്തോ, നിശ്ചിത മേഖലയിലേയോ ആളുകളുടെ വിനോദ ആവശ്യങ്ങൾ പരിഗണിച്ച് അതേസ്ഥലത്ത് തന്നെ തദ്ദേശീയ ടൂറിസം കേന്ദ്രം വികസിപ്പിക്കുക എന്നതാണ് ഗ്രാമീണ ടൂറിസം കൊണ്ട് അർത്ഥമാക്കുന്നത്. കൊവിഡ് സാഹചര്യത്തിൽ വരുന്ന രണ്ട് വർഷക്കാലത്തേക്ക് വിനോദ സഞ്ചാര സാദ്ധ്യതകൾ പരിമിതമാണെന്നിരിക്കെ ആഭ്യന്തരടൂറിസം സാദ്ധ്യതകൾ പ്രോത്സാഹിപ്പിക്കേണ്ടതുണ്ട്. അത്തരത്തിലാണ് ജില്ലയ്ക്കുള്ളിൽ നിൽക്കുന്ന ഈ പദ്ധതിയുടെ പ്രസക്തി.
നഗരവത്കരണം അധികം കടന്നുചെന്നിട്ടില്ലാത്ത ജില്ലയിൽ ഗ്രാമങ്ങളും വന മേഖലകളും ജലാശയങ്ങളുമാണ് ഇതിലൂടെ പ്രധാനമായും ലക്ഷ്യംവയ്ക്കുന്നത്. ഇത്തരത്തിൽ ഒരു പ്രദേശത്തെ ജനങ്ങൾക്ക് ആസ്വദിക്കാവുന്ന കേന്ദ്രങ്ങൾ കണ്ടെത്തി തൽസ്ഥിതി നിലനിറുത്തി ആവശ്യമായ പ്രാഥമിക സൗകര്യങ്ങൾ ഒരുക്കി നൽകുക മാത്രമാണ് ചെയ്യേണ്ടതായുള്ളത്. ഇതിനോടനുബന്ധിച്ച് ചെറിയ ഭക്ഷണ കേന്ദ്രങ്ങളും ചെറിയ ടൂറിസം ആക്ടിവിറ്റികൾ കൂടി ഉൾപ്പെടുത്തുന്നത് ജനപ്രീതി വർദ്ധിപ്പിക്കുകയും വരുമാനമാർഗം ഉണ്ടാക്കുകയും ചെയ്യും. ചെറിയ തരത്തിലുള്ള ട്രക്കിംഗ്, ആറിലൂടെയുള്ള വഞ്ചി സവാരി, രാത്രികളിൽ ക്യാമ്പ് ഫയർ, ചെറിയ ഒത്തുകൂടൽ (കോവിഡ് 19 പ്രോട്ടോകോൾ പാലിച്ചുകൊണ്ട്/കോവിഡാനന്തരം) തുടങ്ങിയവയ്ക്കുള്ള സൗകര്യം ഒരുക്കുന്നതോടുകൂടി ആഭ്യന്തര ടൂറിസം കേന്ദ്രങ്ങൾ വികസിക്കുകയും സാധാരണ ജനങ്ങൾക്ക് പോലും തൊഴിലവസരങ്ങൾ സൃഷ്ടിക്കപ്പെടുകയും ജീവിത നിലവാരം ഉയരുകയും ചെയ്യും. കൊവിഡ് 19 മൂലം തൊഴിൽ നഷ്ടപ്പെട്ട നിരവധിയാളുകൾക്ക് ഇതു പ്രയോജനകരമാകും.
തദ്ദേശ സ്വയംഭരണ സ്ഥാപനങ്ങളിൽ നിന്ന് ഇതിനായി അവരുടെ പ്രദേശത്തെ ടൂറിസം കേന്ദ്രമാക്കി മാറ്റാവുന്ന കേന്ദ്രങ്ങളെ സംബന്ധിച്ചും അവയുടെ പ്രാധാന്യം സംബന്ധിച്ചും വിശദമായ അപേക്ഷ സമർപ്പിക്കാവുന്നതും തുടർന്ന് ടൂറിസം വകുപ്പ് ഇത് പഠിച്ച് സാധ്യതകൾ വിലയിരുത്തിയതിന് ശേഷം പ്രധാനപ്പെട്ട ഒന്നോ രണ്ടോ സ്ഥലങ്ങളിൽ ഇത് ആദ്യ ഘട്ടമായി നടപ്പിലാക്കും. തുടർന്ന് ജില്ലയിലാകമാനം ഘട്ടം ഘട്ടമായി വിപുലീകരിക്കും.
പഞ്ചായത്തുകൾക്കും മുനിസിപ്പാലിറ്റികൾക്കും അവരവരുടെ പ്രദേശത്തെ ടൂറിസം സാധ്യതാ പ്രദേശങ്ങളെ കണ്ടെത്തി ഡി.ടി.പി.സി യുടെ ശ്രദ്ധയിൽപ്പെടുത്താം. കേന്ദ്രങ്ങൾ സംബന്ധിച്ച വിശദാംശവും സ്ഥലത്തിന്റെ പ്രത്യേകതയും ടൂറിസം കേന്ദ്രമാക്കി മാറ്റാവുന്നതിന്റെ സാധ്യതകളും സംബന്ധിച്ച വിശദമായ റിപ്പോർട്ട് ഫോട്ടോകൾ സഹിതം ptadtpc@yahoo.co.in എന്ന ഇമെയിലിലേക്ക് ആഗസ്റ്റ് 31 ന് മുൻപായി അയക്കണം. വിശദവിവരങ്ങൾക്ക് കോഴഞ്ചേരിയിലുള്ള ജില്ലാ ടൂറിസം പ്രമോഷൻ കൗൺസിൽ ഓഫീസുമായി ബന്ധപ്പെടുക. ഫോൺ: 0468 2311343.