പത്തനംതിട്ട- ജില്ലാ കളക്ടറുടെ നേതൃത്വത്തിൽ കോഴഞ്ചേരി താലൂക്ക് അദാലത്ത് ആഗസ്റ്റ് 17 ന് നടത്തും. ജില്ലാ കളക്ടർ പി.ബി നൂഹ് കളക്ടറേറ്റിൽ നിന്നും വീഡിയോ കോൺഫറൻസിലൂടെ അക്ഷയ കേന്ദ്രങ്ങൾ മുഖേനയാണ് പൊതുജനങ്ങളുടെ പരാതികൾ കേൾക്കുന്നത്.
ഇതിനായി കോഴഞ്ചേരി താലൂക്കിലുള്ള അപേക്ഷകർക്ക് ആഗസ്റ്റ് നാലു മുതൽ ഏഴുവരെ വൈകുന്നേരം 5 വരെ കോഴഞ്ചേരിയിലെ അക്ഷയകേന്ദ്രങ്ങളിൽ ഫോൺ മുഖേന രജിസ്റ്റർ ചെയ്യാം. രജിസ്റ്റർ ചെയ്യുന്ന അപേക്ഷയും അപേക്ഷകന്റെ ഫോൺ നമ്പരും അക്ഷയ കേന്ദ്രം രേഖപ്പെടുത്തണം. വീഡിയോ കോൺഫറൻസിന്റെ സമയം അപേക്ഷകരുടെ ഫോണിൽ സംരംഭകൻ അറിയിക്കും. തുടർന്ന് ഓരോ പരാതിക്കാരനും തങ്ങൾക്ക് നിർദേശിച്ചിരിക്കുന്ന സമയത്ത് വീഡിയോ കോൺഫറൻസിൽ പങ്കെടുക്കുന്നതിന് അക്ഷയ കേന്ദ്രത്തിൽ എത്തണം. ജില്ലാ കളക്ടറോട് വീഡിയോ കോൺഫറൻസിലൂടെ പൊതുജനങ്ങൾ ബോധിപ്പിക്കുന്ന പരാതികൾ ഇആപ്ലിക്കേഷൻ വഴി സമർപ്പിക്കുന്നതിനുള്ള സൗകര്യവും അക്ഷയ കേന്ദ്രങ്ങളിലുണ്ട്.
ജില്ലകളിൽ നടത്തിവരാറുള്ള പൊതുജനപരാതിപരിഹാര അദാലത്തുകൾ ഓൺലൈനിൽ സംഘടിപ്പിക്കുന്നതിന്റെ സാദ്ധ്യത പരിശോധിക്കണമെന്ന മുഖ്യമന്ത്രിയുടെ അറിയിപ്പിനെ തുടർന്നാണ് ഓൺലൈൻ പരാതിപരിഹാര സംവിധാനം ഏർപ്പെടുത്തുന്നത്.
വീഡിയോ കോൺഫറൻസിൽ പങ്കെടുക്കുന്നതിന് അനുവദിച്ചിട്ടുള്ള സമയത്ത് മാത്രമേ പരാതിക്കാരൻ എത്താൻ പാടുള്ളൂ.