തഴവ: കുലശേഖരപുരം ഗ്രാമ പഞ്ചായത്തിലെ കുടിവെള്ള ക്ഷാമം പരിഹരിക്കുന്നതിന് സമഗ്ര പദ്ധതി.

പഞ്ചായത്തിന്റെ പടിഞ്ഞാറൻ മേഖലയിലെ ഒന്ന്, ഇരുപത്തി ഒന്ന്, ഇരുപത്തിരണ്ട്, ഇരുപത്തിമൂന്ന് വാർഡുകളിലാണ് അതിരൂക്ഷമായ കുടിവെള്ള ക്ഷാമം നേരിടുന്നത്. ഇതിന് ശാശ്വത പരിഹാരം കാണുന്നതിന്റെ ഭാഗമായി പുത്തൻ തെരുവ് സ്റ്റേഡിയം കോമ്പൗണ്ട്, പുതിയകാവ് താഴത്തോടത്ത് ജംഗ്ഷൻ, പുളിക്കാമഠം ജംഗ്‌ഷൻ എന്നിവിടങ്ങളിൽ മൂന്ന് കുഴൽ കിണറുകൾ സ്ഥാപിക്കുന്നതിനുള്ള നടപടിയാണ് ആരംഭിച്ചത്.

ആർ. രാമചന്ദ്രൻ എം.എൽ.എ യുടെ പ്രാദേശിക വികസന ഫണ്ടിൽ നിന്നുള്ള തുക ഉപയോഗിച്ചാണ് പുളിക്കാമഠം ജംഗ്‌ഷനിൽ കുഴൽ കിണർ സ്ഥാപിക്കുന്നത്. ഇവിടെ ഗ്രാമ പഞ്ചായത്ത് ഏഴു ലക്ഷത്തി എഴുപത്തിനാലായിരം രൂപ ചെലവഴിച്ചാണ് പമ്പ് ,പമ്പ് ഹൗസ് എന്നിവ സ്ഥാപിക്കുന്നത് ഉൾപ്പടെയുള്ള ജോലികൾ പൂർത്തിയാക്കുന്നത്.

പുത്തൻ തെരുവ് സ്റ്റേഡിയം കോമ്പൗണ്ടിൽ ഭൂജല വകുപ്പിന്റെയും പുതിയകാവ് താഴത്തോടത്ത് ജംഗ്ഷനിൽ ജല അതോറിറ്റിയുടെയും നേതൃത്വത്തിൽ കുഴൽ കിണർ സ്ഥാപിക്കുന്നതിനുള്ള നടപടിയും പുർത്തിയായി.

തദ്ദേശ സ്വയംഭരണ സ്ഥാപനങ്ങൾക്ക് കേന്ദ്ര സർക്കാർ നൽകുന്ന പദ്ധതി തുകയുടെ അൻപത് ശതമാനം കുടിവെള്ളം, ശുചിത്വം എന്നീ മേഖലകളിൽ ചെലവഴിക്കാനാണ് ആലോചിക്കുന്നത്. ഈ ഇനത്തിൽ കുലശേഖരപുരം ഗ്രാമ പഞ്ചായത്തിൽ കുടിവെള്ള പദ്ധതിക്കായി ഒരു കോടി അഞ്ച് ലക്ഷത്തി പതിനായിരം രൂപ വരെ ലഭിക്കും.

3 കിഴൽ കുണറുകൾ

1. പുത്തൻ തെരുവ് സ്റ്റേഡിയം കോമ്പൗണ്ടിൽ

2. പുതിയകാവ് താഴത്തോടത്ത് ജംഗ്ഷനിൽ

3. പുളിക്കാമഠം ജംഗ്‌ഷനിൽ

ജലജീവൻ പദ്ധതി

കേന്ദ്ര-സംസ്ഥാന സർക്കാരുകൾ സംയുക്തമായി നടപ്പാക്കുന്ന ജലജീവൻ പദ്ധതി പഞ്ചായത്തിൽ പൂർണമായും നടപ്പാക്കാനാണ് അധികൃതർ ലക്ഷ്യമിടുന്നത്. ഇതുവഴി മുഴുവൻ കുടുംബങ്ങൾക്കും കുടിവെള്ള പൈപ്പ് കണക്ഷൻ നൽകാനും കുടിവെള്ളക്ഷാമം പരിഹരിക്കാനും കഴിയും. എന്നാൽ കേന്ദ്ര സർക്കാരിന്റെ പദ്ധതി തുകയുടെ പകുതി കുടിവെള്ള പദ്ധതികൾക്കായി ചെലവഴിക്കാൻ കഴിയില്ലെന്ന് തദ്ദേശ സ്വയംഭരണ വകുപ്പും ചെലവഴിക്കാമെന്ന് ജലവിഭവ വകുപ്പും രണ്ട് നിലപാടെടുത്തതോടെ ഈ തുക വിനിയോഗിക്കുന്നതിൽ അനിശ്ചിതത്വം തുടരുകയാണ്.

കുടിവെള്ള ക്ഷാമം ഏറെ രൂക്ഷമായ പ്രദേശങ്ങളിൽ ടാങ്കർ ഉപയോഗിച്ചുള്ള ജലവിതരണം തുടരുകയാണ്. കൊവിഡ് പ്രതിസന്ധി മൂലമുള്ള താത്കാലിക തടസം നീങ്ങുന്നതോടെ പഞ്ചായത്തിലെ കുടിവെള്ള ക്ഷാമത്തിന് ശാശ്വത പരിഹാരമാകും

ശീലേഖ കൃഷ്ണകുമാർ, പ്രസിഡന്റ്

മനോജ്, സെക്രട്ടറി (കുലശേഖരപുരം ഗ്രാമ പഞ്ചായത്ത്)