കൊട്ടാരക്കര: ഉമ്മന്നൂർ പഞ്ചായത്തിലെ നെടുമൺകാവ് വാർഡിൽ സ്ഥാപിച്ച ഇടിയാപ്പാറ ഭൂജലാധിഷ്ഠിത കുടിവെള്ള പദ്ധതി നോക്കുകുത്തിയായി. ഉദ്ഘാടനം കഴിഞ്ഞ് ആറ് മാസമെത്തും മുൻപെ എട്ട് ലക്ഷം രൂപ മുടക്കി നിർമ്മിച്ച കുടിവെള്ള പദ്ധതി പണിമുടക്കി. നാൽപതിലധികം കുടുംബങ്ങൾ മഴക്കാലത്തും കുടിവെള്ളത്തിനായി ബുദ്ധിമുട്ടുന്നു. വെട്ടിക്കവല ബ്ളോക്ക് പഞ്ചായത്തിന്റെ നേതൃത്വത്തിലാണ് ഇവിടെ 2019-20 വർഷത്തെ പദ്ധതിയിൽ ഉൾപ്പെടുത്തി കുടിവെള്ള പദ്ധതി സ്ഥാപിച്ചത്. കഴിഞ്ഞ ഫെബ്രുവരി 9ന് ഉദ്ഘാടനവും നടത്തി. ഒരു മാസം തികഞ്ഞപ്പോഴേക്കും മോട്ടോർ തകരാറായി. തകരാർ പരിഹരിച്ച് അധികനാൾ പമ്പിംഗ് നടന്നില്ല. വീണ്ടും തകരാർ പരിഹരിച്ചെങ്കിലും മാസങ്ങൾ പിന്നിടും മുൻപെ മൂന്നാം തവണയും മോട്ടോർ തകരാറിലായതോടെയാണ് നാട്ടുകാരും പ്രതിഷേധവുമായെത്തിയത്. നിലവാരം കുറഞ്ഞ മോട്ടോർ പമ്പും പൈപ്പുകളും ഉപയോഗിച്ചതുകൊണ്ടാണ് ഇടയ്ക്കിടെ തകരാർ സംഭവിക്കുന്നതെന്ന് നാട്ടുകാർ ആരോപിച്ചു.

ബി.ജെ.പി പ്രതിഷേധ കൂട്ടായ്മ സംഘടിപ്പിച്ചു

കുടിവെള്ള പദ്ധതിയുമായി ബന്ധപ്പെട്ട് നടന്ന അഴിമതി അന്വേഷിക്കണമെന്നും തകരാർ ശാശ്വതമായി പരിഹരിച്ച് പ്രദേശത്തെ കുടിവെള്ള പ്രശ്നത്തിന് അറുതിയുണ്ടാക്കണമെന്നും ആവശ്യപ്പെട്ട് ബി.ജെ.പി ഉമ്മന്നൂർ പഞ്ചായത്ത് സമിതിയുടെ നേതൃത്വത്തിൽ പ്രതിഷേധ കൂട്ടായ്മ സംഘടിപ്പിച്ചു. മണ്ഡലം പ്രസിഡന്റ് വയയ്ക്കൽ ഉദ്ഘാടനം ചെയ്തു. നിയോജക മണ്ഡലം ജനറൽ സെക്രട്ടറി കെ.ആർ.രാധാകൃഷ്ണൻ, ഓടനാവട്ടം മേഖലാ പ്രസിഡന്റ് രഞ്ജിത്ത്, തുളസി കണതാക്കൽ, ശശിധരൻ കാക്കത്താനം, ഷാജീവ് കുമാർ, ശ്രീവാവ, എസ്.കെ.ശാന്തു, അനൂബ് എന്നിവർ പങ്കെടുത്തു. കൊവിഡ് പ്രോട്ടോക്കോൾ പാലിച്ചായിരുന്നു കൂട്ടായ്മ.